मोबिन खान

अकोले/अहमदनगर: औरंगाबादचे संभाजीनगर आणि उस्मानाबादचे धाराशीव नामांतर करण्याचा निर्णय महाविकास आघाडी सरकारने घेतला होता. या निर्णयाला राज्यातील नवनिर्वाचित एकनाथ शिंदे-देवेंद्र फडणवीस सरकारने घेतल्याचे वृत्त आहे. त्यानंतर शिवसेनेच्या नेत्यांनी या सरकारवर टीकेची झोड उठवली असतानाच, विरोधी पक्षनेते आणि राष्ट्रवादी काँग्रेसचे नेते अजित पवार यांनीही टीकास्त्र सोडलं आहे. बाळासाहेबांच्या विचारांवर चालणारे आहोत, असे म्हणणाऱ्या मुख्यमंत्र्यांनी औरंगाबादच्या नामांतराला स्थगिती का दिली, असा थेट सवाल पवार यांनी एकनाथ शिंदे यांना केला आहे. (Ajit Pawar-Eknath Shinde Latets News in Marathi)

शिवसेना प्रमुख दिवंगत बाळासाहेब ठाकरे (Balasaheb Thackeray) यांनी सांगितलं होतं, माझं सरकार आल्यावर मी औरंगाबादचं (Aurangabad) संभाजीनगर नामकरण करेल, मग आम्ही बाळासाहेबांच्या विचारांवर चालणारे आहोत असे म्हणणाऱ्या मुख्यमंत्र्यांनी (Eknath Shinde) औरंगाबादच्या नामांतराला स्थगिती का दिली, असा सवाल विधानसभेचे विरोधी पक्षनेते अजित पवार (Ajit Pawar) यांनी उपस्थित केला. अकोले येथे आज अगस्ती सहकारी साखर कारखाना निवडणुकीसाठी शेतकरी समृद्धी मंडळाच्या उमेदवारांच्या प्रचार सभेसाठी पवार आले होते. कार्यक्रमानंतर माध्यमांशी संवाद साधताना ते बोलत होते.

एनडीएच्या राष्ट्रपतीपदाच्या उमेदवार द्रौपदी मुर्मू यांना शिवसेनेने पाठिंबा दिला. त्यामुळे महाविकास आघाडीत (Mahavikas Aghadi) मतभेद आहेत का? यावर पवार म्हणाले, की यापूर्वीही शिवसेनेने यूपीएच्या प्रतिभा पाटील, प्रणव मुखर्जींना पाठिंबा दिलेला आहे. शिवसेना (Shivsena) हा त्यांचा स्वतंत्र पक्ष असून, मातोश्रीचा निर्णय आहे.

राज्याला इतके दिवस मंत्रिमंडळापासून पूर्ण बहुमत असताना वंचित ठेवणे बरोबर नाही. लवकर मंत्रिमंडळ नेमण्यात येत नाही. पालकमंत्री नेमले गेले नाहीत. उद्या मी मुख्यमंत्री यांची भेट घेणार असल्याचेही पवार यांनी सांगितले. राजकीय नेत्यांच्या भेटीगाठी होतच असतात. मतमतांतरे असतात, म्हणजे आम्ही एकमेकांचे दुश्मन नसतो. आपल्या महाराष्ट्राची परंपरा वेगळी आहे, असेही पवार म्हणाले. राज ठाकरेंचं मागील कालावधीत ऑपरेशन झालं. म्हणून कदाचित देवेंद्र फडणवीस राज ठाकरेंना भेटले असावेत, असे भाष्य अजित पवार यांनी फडणवीस आणि राज ठाकरे यांच्या भेटीबाबत केलं.

Edited By - Nandkumar Joshi