Ajit Pawar Vs Nana Patole : सत्तासंघर्षाच्या निकालानंतर महाविकास आघाडीमध्ये विसंवाद वाढतोय का? असा प्रश्न निर्माण झाला आहे. त्यामागचं कारण ही तसेच आहे. गुरुवारी राष्ट्रवादीचे प्रदेशाध्यक्ष जयंत पाटील यांना ईडीची नोटीस आली होती.

याबाबत ठाकरे गटाचे नेते संजय राऊत यांना पत्रकारांनी प्रश्न विचारला असता, ते म्हणाले होते की, याबाबत त्यांचे प्रवक्ते बोलतील. यातच आता काँग्रेस आणि राष्ट्रवादीमधील नवीन शाब्दिक वाद समोर आला आहे.

महाविकास आघाडी सरकारच्या काळातील विधानसभा अध्यक्षांनी मुख्यमंत्र्यांना न विचारताच राजीनामा दिला होता, असं विधानसभेचे विरोधी पक्षनेते अजित पवार म्हणाले होते. त्यावर आता काँग्रेस प्रदेशाध्यक्ष नाना पटोले यांनी पलटवार केला असून अजित पवार खोटं बोलत आहेत, असं ते म्हणाले आहेत.  (Breaking Marathi News)

'Ajit Pawar On Nana Patole : पटोले यांनी मुख्यमंत्र्यांना न विचारताच राजीनामा दिला'

राष्ट्रवादी नेते अजित पवार म्हणाले होते की, ''आमचे त्यावेळचे (महाविकास आघाडी सरकारच्या काळातील) विधानसभा अध्यक्ष यांनी त्यावेळच्या मुख्यमंत्र्यांना न विचारताच राजीनामा दिला. राजीनामा दिल्यावरच त्यांना सांगितलं.''

ते म्हणाले, ''एकतर तो द्यायला नको होता. तो राजीनामा दिल्यावर लगेच विधानसभा अध्याक्षांची निवडणूक लावून तो विषय संपवला पाहिजे होता. मी कोणाला दोष देत नाहीये. पण दुर्दैवानं आमच्या सगळ्यांकडून, महाविकास आघाडीकडून तो विषय तातडीने धसास लागला असता तर विधानसभेचे अध्यक्ष बसले असते आणि त्यांच्या अधिपत्याखाली या सगळ्या गोष्टी झाल्या असत्या.''