IMD Maharashtra weather alert latest update : गेल्या काही दिवसांपासून राज्यात पावसाने विश्रांती घेतली असली तरी आता हवामानात मोठा बदल झाला आहे. पुढील काही दिवस राज्यातील काही भागात पावसाची शक्यता वर्तवण्यात आली आहे. हवामान विभागाने दिलेल्या ताज्या अंदाजानुसार, आजपासून राज्यातील अनेक भागांत पावसाचा जोर पुन्हा वाढणार आहे. कोकण, मध्य महाराष्ट्र आणि मराठवाड्यातील काही जिल्ह्यांमध्ये विजांच्या कडकडाटासह मुसळधार ते हलक्या स्वरूपाच्या पावसाची शक्यता वर्तवण्यात आली आहे.

कुठे कसा राहील पावसाचा अंदाज?

कोकणातील पालघर, ठाणे, रायगड, रत्नागिरी आणि सिंधुदुर्ग या भागात ढगाळ हवामानासह काही ठिकाणी मध्यम ते जोरदार पावसाची शक्यता आहे. तसेच नाशिक, पुणे आणि साताऱ्याच्या घाटमाथ्यावर पावसाचा जोर जास्त राहू शकतो. तर नाशिक, जळगाव, अहमदनगर, पुणे, सातारा आणि सांगली या जिल्ह्यांत वादळी वाऱ्यासह आणि विजांच्या कडकडाटासह पाऊस होण्याचा अंदाज आहे.

विदर्भ मराठवाड्यात पावसाचा सर्वाधिक जोर

छत्रपती संभाजीनगर, जालना, बीड, धाराशिव, लातूर, नांदेड, परभणी आणि हिंगोली या भागात काही ठिकाणी ढगांच्या गडगडाटासह जोरदार पावसाचा अंदाज वर्तवण्यात आला आहे. तर विदर्भातील नागपूर, चंद्रपूर, अमरावती, अकोला आणि यवतमाळ परिसरातही पावसासाठी अनुकूल वातावरण तयार झाले असून येथेही काही भागात येलो अलर्ट जारी करण्यात आला आहे.

शेतकऱ्यांना अन् नागरिकांना सतर्कतेचा इशारा

हवामान तज्ज्ञांच्या मते, अरबी समुद्र आणि बंगालच्या उपसागरातील हवामानाच्या स्थितीमुळे बाष्प वाढले आहे. त्यामुळे पावसाला पोषक वातावरण तयार झाले आहे. दुपारनंतर किंवा संध्याकाळच्या वेळी विजांच्या कडकडाटासह आणि जोरदार वाऱ्यासह अचानक पाऊस सुरू होण्याची शक्यता आहे. उर्वरित महाराष्ट्रात तुरळक ठिकाणी पावसाची शक्यता आहे. पुणे-मुंबईत ढगाळ वातावर राहू शकते असाही अंदाज आहे.