अक्षय गवळी, अकोला प्रतिनिधी

Ahmedabad Air India Plane Crash on Hostel death Toll News : गुजरातमधील अहमदाबाद येथे बुधवारी झालेल्या भीषण विमान अपघातात अकोल्याची मुलगी ऐश्वर्या तोष्णीवाल थोडक्यात वाचली. अपघाताच्या वेळी ती हॉस्टेलच्या दुसऱ्या इमारतीच्या पाचव्या मजल्यावर झोपलेली होती. अचानक मोठा आवाज झाला आणि सर्वत्र धुराचे लोट पसरले. त्या परिस्थितीतही ऐश्वर्याने धीर न सोडता धुराच्या गर्दीतून वाट काढत स्वतःचा जीव वाचवला. ऐश्वर्या गुजरात कॅन्सर रिसर्च इन्स्टिट्यूट मेडिकल कॉलेज, अहमदाबाद येथे डीएम अँकोपॅथोलॉजीच्या दुसऱ्या वर्षात शिक्षण घेत आहे. ती आपल्या आजोबांचा वाढदिवस साजरा करून अकोल्याहून अहमदाबादला परतली होती.

झोपेत असताना ती अचानक मोठ्या आवाजाने जागी झाली. उठून पाहिलं तर सर्वत्र धुराच धूर होता. परिस्थितीचं गांभीर्य लक्षात येताच तिने स्वतःला कंबळात लपेटलं आणि अंधार व धुराच्या गर्दीतून मार्ग शोधत पाचव्या मजल्यावरून खाली उतरून स्वतःचा जीव वाचवला. या दरम्यान तिच्या चेहऱ्यावर, हातावर आणि पायावर भाजल्याचे निशाण आले. दरम्यान, ज्या मेडिकल कॉलेजच्या हॉस्टेलवर विमान कोसळले, तेथील २० ते २५ मुलांचा मृत्यू झाला आहे.

घाबरलेल्या अवस्थेत ऐश्वर्याने लगेच आपल्या वडिलांना अमोल तोष्णीवाल यांना फोन केला. ते त्या वेळी अकोल्याच्या दुर्गा चौकात आपल्या साड्यांच्या दुकानात होते. मुलीचा फोन येताच ते हादरून गेले आणि दुकान बंद करून तात्काळ घरी गेले. अमोल तोष्णीवाल यांनी सांगितले, "टीव्हीवर बातम्या पाहताच आमचं डोकंच सुन्न झालं. पण देवाच्या कृपेने आमची मुलगी एवढ्या मोठ्या अपघातातून बचावली."

आई माधुरी तोष्णीवाल आणि आजी-आजोबा यांच्या डोळ्यांतही अश्रू तरळले. आजोबा म्हणाले, "पोती आमच्या वाढदिवसासाठी आली होती, पण अशा अपघाताला तिला सामोरे जावे लागले. देवाचे शंभर वेळा आभार की ती सुखरूप आहे."

हादरलेल्या तोष्णीवाल कुटुंबीयांनी या दुर्घटनेत जखमी आणि मृत्यूमुखी पडलेल्यांप्रती आपल्या संवेदना व्यक्त केल्या आहेत. ऐश्वर्या म्हणाली, "माझ्या आयुष्यातला हा सर्वात भयावह अनुभव होता, जो मी कधीच विसरू शकणार नाही."