सुशील थोरात 

बेलवंडी (अहमदनगर) : गावापासून जवळ असलेल्या डोहात कपडे धुण्यासाठी गेलेल्या आईसोबत मुलगा देखील गेला होता. दरम्यान डोहात पोहण्यासाठी उतरलेल्या मुलाचा आईच्या डोळ्यादेखत बुडून मृत्यू झाल्याची घटना श्रीगोंदा तालुक्यातील बेलवंडी गावात घडली आहे. 

अहमदनगरच्या श्रीगोंदा (Shrigonda) तालुक्यातील बेलवंडी येथील डोहात पोहचण्यासाठी गेलेला अकरावीत शिकणाऱ्या साई पवार या मुलाचा पाण्यात बुडून दुर्दैवी मृत्यू झाला. साई पवार सोमवारी (२३ सप्टेंबर) कपडे धुण्यासाठी डोहावर आलेल्या त्याच्या आईसोबत आला होता. यावेळी डोहात पोहण्यासाठी गेला. पोहत असताना तो डोहाच्या मधोमध गेला. यामुळे त्याला पाण्याचा अंदाज न आल्याने त्याला बाहेर निघता न आल्याने तो पाण्यात बुडाला. मुलाला बुडत असताना सोबत असलेली आई त्याला वाचवू शकली नाही. 

मुलगा बुडाल्याचे पाहून आईने जोरजोरात आरोड्या मारल्या. यामुळे परिसरातील काही नागरिक मदतीसाठी धावले. यानंतर दुपारपासून त्याचा शोध सुरू होता. मात्र सायंकाळी त्याचा मृतदेह बाहेर काढण्यात ग्रामस्थांना यश आले. यासाठी आण्णासाहेब शेलार यांनी रायगव्हाण येथून प्रशिक्षित युवकांची टीम बोलावली होती. या दुर्दैवी घटनेने परिसरावर शोककळा पसरली आहे.