Kalyan crime : चोरलेली बाइक पाहायला आले अन् जाळ्यात अडकले, नागरिकांच्या सतर्कतेमुळे अट्टल चोरांना घडली जन्माची अद्दल

अभिजित देशमुख 
कल्याण : कल्याणच्या एपीएमसी मार्केटमध्ये विना नंबर प्लेटच्या दुचाकीवर आलेल्या दोघा जणांना बाजारपेठ पोलिसांनी ताब्यात घेतले आहे. चौकशी दरम्यान हे दोघे सराईत चोरटे असल्याचे समोर आले. चोरी करुन ठेवण्यात आलेली दुचाकी जागेवर आहे की नाही, हे पाहण्यासाठी चोरटे आले आणि पोलिसांच्या ताब्यात सापडले आहे. 

वाहिद खान आणि राहूल परिहार अशी पोलिसांनी (Police) ताब्यात घेतलेल्या चोरट्यांची नावे आहेत. दोघांनी मिळून आत्तापर्यत तीन दुचाकी आणि दोन रिक्षा चाेरी केल्या आहे. दरम्यान (Kalyan) कल्याण कृषी उत्पन्न बाजार नेहमी गर्दी असते. फळ आणि भाजीपाल्याच्या गाड्या लागलेल्या असतात. या गर्दीचा फायदा घेत एका दुचाकीवर दोन तरुण फिरत असल्याचे काही लोकांना दिसले. या दुचाकीला नंबर प्लेट नव्हती. नंबर प्लेट नसलेली दुचाकी फिरत असल्याने त्याठिकाणच्या लोकांना संशय आला. याची माहिती बाजारपेठ पोलिसांना दिली. 

बाजारपेठ पोलिस ठाण्याचे वरिष्ठ पोलिस निरिक्षक सुरेश सिंग गौड यांनी या तरुणांची चौकशी करण्याकरीता पोलिस अधिकारी अजिंक्य मोरे आणि काही पोलिसाना पाठविले. पोलिसांनी या दोन तरुणाना ताब्यात घेऊन चौकशी केली असता दोघे तरुण घेऊन आलेली दुचाकी चाेरीची होती. पोलिसांनी त्यांची अधिक चौकशी केली असता दोघे सराईत चोर असल्याची माहिती समोर आली. तर चोरी केलेली  दुचाकी कृषी उत्पन्न बाजार समितीच्या आवारात उभी करुन ठेवली होती. त्याच ठिकाणी ती दुचाकी आहे की नाही हे पाहण्यासाठी ते आले होते. त्यांच्याकडून चोरीस गेलेल्या तीन दुचाकी आणि दोन रिक्षा जप्त केल्या आहे.