सुशिल थोरात

Ahmednagar News: अपघाताच्या घटनांचे प्रमाण सातत्याने वाढत आहे. अशात अहमदनगरमधून एक मोठी दुर्दैवी घटना समोर आलीये. दोन वाहनांच्या जोरदार धडकेत जिल्हा परिषदेच्या २ कर्मचाऱ्यांना आपला जीव गमवावा लागला आहे. या घटनेमुळे गावात सर्वत्र शोककळा पसरली आहे. (Latest Accident News)

मिळालेल्या अधिक माहितीनुसार, ट्रक आणि एक चारचाकी कारची सामोरासमोर जोरदार धडक झाली. हा अपघात इतका भीषण होता की कारचा यात चक्काचूर झाला आहे. कारमधून तीन व्यक्ती प्रवास करत होत्या. वाहनावरील नियंत्रण सुटल्याने कार आणि ट्रक (Truck) वेगात एकमेकांवर आदळले.

त्यामुळे कारमध्ये पुढे बसलेल्या दोन व्यक्तींचा जागीच मृत्यू झाला आहे. तर एक जण गंभीर जखमी आहे. जिल्हा परिषदेचे कक्ष अधिकारी अशोक व्यवहारे, विनायक कातोरे, संतोष लंके हे शासकीय कामानिमित्त नाशिकहून अहमदनगरकडे (Ahmednagar) येत होते.

यावेळी नगर मनमाड रोडवरील वांबोरी फाट्यानजीक ट्रक आणि कारचा भीषण अपघात झाला. दुर्दैवाने अशोक व्यवहारे व विनायक कातोरे यांचा दुर्दैवी अंत तर संतोष लंके हे जखमी आहेत. त्यांना खाजगी रुग्णालयात दाखल करण्यात आले असून त्यांच्यावर उपचार सुरू आहेत.