सचिन बनसोडे 

राहुरी (अहिल्यानगर) : केंद्रीय तपास यंत्रणांचा वापर विरोधकांवर दबाव आणण्यासाठी होतोय. पण आता त्यांच्याच सरकारचे मंत्री याबाबत सांगत असतील, तर जनतेने महायुती सरकारवर कसा विश्वास ठेवायचा? असा प्रश्न राष्ट्रवादी शरद पवार गटाचे आमदार प्राजक्त तनपुरे यांनी उपस्थित केला.

विधानसभा निवडणुकीत (Chagan Bhujabal) छगन भुजबळ यांच्या ईडी बाबतच्या वक्तव्यामुळे राजकीय वर्तुळात क्रिया प्रतिक्रिया सुरू झाल्या आहेत. ईडी कारवाईला सामोरे जात असलेले राष्ट्रवादी शरद पवार पक्षाचे उमेदवार आमदार प्राजक्त तनपुरे (Prajakt Tanpure) यांनी देखील विषयावर भाष्य केले आहे. 

संविधानानुसर ईडी ही स्वायक्त संस्था असून तिची स्वायक्तता धोक्यात आणून फक्त स्वतःच्या फायद्याकरिता सत्ताधारी पक्ष यंत्रणांचा वापर करत आहेत. मला देखील ईडीची नोटीस आली आणि मी त्या नोटिशीला सामोरे गेलो. जे प्रश्न ईडी अधिकाऱ्यांनी विचारले त्याची मी उत्तरे दिली. याबाबत कोर्टामध्ये तारीख चालू आहे. त्यामुळे न्यायप्रविष्ट बाब असल्याने त्यावर बोलणे उचित नाही. मात्र सरकारमधील मंत्री जर ईडीबाबत खुलासे करत असतील; तर जनतेने महायुती सरकारवर विश्वास कसा ठेवायचा? अशी प्रतिक्रिया प्राजक्त तनपुरे यांनी दिली.