सुशील थोरात

Jamkhed accident, CNG explosion : अहिल्यानगरमधील जामखेडमध्ये आज पहाटे दुर्देवी घटना घडली आहे. कार डिव्हायडरला धडकल्यामुळे सीएनजीने पेट घेतला अन् दोन जणांचा होरपळून मृत्यू झाला. मृतामध्ये जामखेड पोलिस स्टेशनमधील पोलीस कर्मचाऱ्याचाही समावेश आहे. अपघातानंतर परिसरात एकच खळबळ उडाली आहे.

बीडहून जामखेडच्या दिशेने येणाऱ्या कारने डिव्हायडरला जोरदार धडक दिली. भीषण धडक बसल्यानंतर सीएनजीने पेट घेतला अन् कारला भीषण आग लागली. या आगीत दोन जणांचा होरपळून मृत्यू झाला. मृत्यूमध्ये जामखेड पोलीस ठाण्यातील कर्मचाऱ्यांचा समावेश आहे. महादेव दत्ताराम काळे आणि जामखेड पोलीस ठाण्यातील पोलीस कॉन्स्टेबल धनंजय नरेश गुडवाल अशी मृताची नावे आहेत. सोमवारी पहाटे ४ वाजता अपघात झाला.

आग इतकी भीषण होती, की कार जळून खाक झाली. गाडीत जळून मृत्यू झालेल्या मध्ये जामखेडचे पोलीस कर्मचारी धनंजय नरेश गुडवाल व जामखेड मधील साईनाथ पान शॉपचे व्यापारी महादेव काळे यांचा समावेश आहे. कारने रस्त्याच्या बाजूला असणाऱ्या डिव्हायडरला धडक दिली, त्यानंतर १५० फूटावर कार फरफटत गेली होती. त्यामुळे सीएनजीने पेट घेतला, अन् कारमध्ये आग लागली.

कार अत्याधुनिक असल्यामुळे अपघातानंतर लॉक झाली, त्यामुळे आतमध्ये असणाऱ्या दोघांना बाहेर पडता आले नाही. कारबरोबर दोघेही जळून खाक झाले, त्यांना ओळखणेही शक्य झाले नाही. मोबाईलवरून ओळख पटवण्यात आली. अपघातात पोलीस कर्मचारी गुडवाल यांचा मोबाईल पडलेला होता, त्यामुळे ते एक असावेत व गाडी मालक काळे असे दोघे असावेत असा अंदाज पोलिसांनी लावला आहे. सदर घटनेचा तपास पोलीस निरीक्षक महेश पाटील यांच्या मार्गदर्शनाखाली जामखेड पोलीस करत आहेत.