हिंदी भाषा आणि परप्रांतीयांच्या मुद्यावरुन नुकतच मुंबईतील राजकीय वातावरण ढवळून निघालं होतं. मराठीच्या मुद्यावरुन ठाकरे बंधूही एकत्र आलेत. मात्र आता हा वाद मुंबईपर्यंत मर्यादित न राहता नाशिकमध्येही पोचलाय.केवळ गाडीचा धक्का लागला यावरून हा वाद झाला होता. शहरातील जय भवानी रोड परिसरामध्ये परप्रांतीय महिला रामेश्वरी पंडित गाडी शिकत होती. तिच्या गाडीचा धक्का लासुरे कुटुंबाच्या वाहनाला लागला.

त्यानंतर गाडीच्या नुकसानीच्या खर्चावरुन वाद झाला. तेव्हा मराठी लोगो की औकात क्या? तुम मराठी लोक भंगार हो, अशी मुजोरी पंडीत कुटुंबाने केल्याचा आरोप आहे.

यावरुन मनसे कार्यकर्त्यांनी रामेश्वरी पंडित यांचे सासरे वैद्यनाथ पंडित यांना जाब विचारला तेव्हा त्यांनी अरेरावीची भाषा वापरल्यामुळे कार्यकर्त्यांनी त्यांना मारहाण केली.या सगळ्या वादानंतर परप्रांतीय कुटुंबीयांनी देखील आपली बाजू मांडली. आम्ही मराठी माणसाला कुठलाही अपशब्द वापरला नाही असा दावा करत नरमाईची भूमिका घेतली

दरम्यान या सगळ्या वादाप्रकरणी नाशिकच्या उपनगर पोलीस ठाण्यामध्ये लासुरे कुटुंबीयांनी तक्रार दाखल केली आहे. या परप्रांतीय कुटुंबीयांकडून देखील पोलिसांकडे तक्रार करण्यात आलीय. त्यामुळे आता या मराठी विरुद्ध परप्रांतीय वादावर पोलीस ठाण्यातील तक्रारीनंतर पडदा पडतो की हा वाद अजून वाढतो? हे बघणं महत्त्वाचं असणार आहे.