sanjay shirsat vs abdul sattar : माजी मुख्यमंत्री एकनाथ शिंदे नाराज असल्याच्या चर्चा सुरू असतानाच, त्यांच्याच नेतृत्वातील शिवसेनेत मोठी धुसफूस सुरू असल्याचं समोर आलेय. छत्रपती संभाजीनगरमध्ये आजी-माजी मंत्र्यांमधील मतभेद चव्हाट्यावर आले आहेत. माजी मंत्री आणि सिल्लोडचे आमदार अब्दुल सत्तार आणि विद्यमान मंत्री संजय शिरसाट यांच्यामध्ये आरोप प्रत्यारोपाच्या फेरी सुरू आहेत. जाहीर सभेत संजय शिरसाट यांनी सत्तार यांचा समाचार घेतला. आता अब्दुल सत्तार शिरसाट यांची तक्रार एकनाथ शिंदे यांच्याकडे करणार आहेत.

छत्रपती संभाजीनगरचे पालकमंत्री आणि राज्याचे सामाजिक न्याय मंत्री संजय शिरसाट (Sanjay shirsat) आणि माजी पालकमंत्री सिल्लोडचे आमदार अब्दुल सत्तार यांच्यातील वाद आता वाढत चालला आहे. सोमवारी संध्याकाळी छत्रपती संभाजीनगर शहरामध्ये झालेल्या नागरी सत्काराच्या वेळेस संजय शिरसाट यांनी अब्दुल सत्तार यांच्यावर नाव न घेता टीका केली होती. त्याबद्दल आता अब्दुल सत्तार हे मुख्यमंत्री एकनाथ शिंदे यांच्याकडे तक्रार करणार आहेत.

अब्दुल सत्तार साम टीव्हीशी बोलताना म्हणाले, 'ही बाब एकनाथ शिंदे यांच्या कानावर टाकणार आहेत. सध्या मी माध्यमांशी बोलणार नाही. एकनाथ शिंदे साहेबांना याबद्दल सांगणार आहे. त्यानंतर मग ते जे म्हणतील त्यानुसार मी पाऊल टाकणार आहे.'

दरम्यान, अब्दुल सत्तार यांच्या तक्रारीनंतर एकनाथ शिंदे काय निर्णय घेतील, याची राजकीय वर्तुळात चर्चा सुरू आहे.

संजय शिरसाट काय म्हणाले होते ?

कपटकारस्थान करणाऱ्या माणसाने व्हॉइस चॅट शिंदेंना दाखवत मला मंत्री कसे करू नये असे प्रयत्न झाले. मंत्रीपदाची शपथ घेताना हात लटपट कापत होते. मी मंत्री झालो हे काही जणांच्या पोटात दुखत होते. निवडणुकीच्या काळात मी टेन्शन घेत नाही पण करेक्ट कार्यक्रम करतो .या निवडणुकीत पैसे जास्त लागले पण मीही मोकळा हात केला, असे शिरसाट म्हणाले.