नंदुरबार : नंदुरबार पोटनिवडणूकीत जिल्हा परिषदेच्या 11 गट आणि पंचायत समितीच्या 14 गणांसाठी 77 उमेदवारांमध्ये अत्यंत चुरशीच्या लढतीत मतदान प्रक्रिया पार पडल्यानंतर आज निकाल स्पष्ट होणार आहे. पोटनिवडणुकीत राजकीय नेत्यांच्या कुटुंबातूनच सर्वाधिक उमेदवार असल्याने घटक पक्षांचे नेत्यांसाठी प्रतिष्ठेची लढाई ठरली आहे.

हे देखील पहा-

जिल्हा परिषदेच्या 18 गटांसाठी 35 उमेदवार तर पंचायत समितीच्या 14 गणांसाठी 41 उमेदवार रिंगणात आहेत. दरम्यान अक्कलकुवा तालुक्यातील कोराई गणात माघारी अंती शिवसेनेचा उमेदवार बिनविरोध झाल्याने त्यांचा विजय निश्चित झालेला आहे. एकूणच नंदुरबार जिल्ह्यातील पोटनिवडणुकीचे चित्र भाजप विरुद्ध महाविकास आघाडी असे पाहायला मिळत आहे.

माजी मंत्री तथा भाजप आमदार डॉ. विजयकुमार गावित यांच्या कन्येने कोळदे गटातून राजकारणात पदार्पण केले आहे, तर आदिवासी विकास मंत्री के. सी पाडवी यांच्या भगिनीने खापर गटातून भाजपचे उमेदवार नागेश पाडवी यांच्याविरुद्ध जोरदार टक्कर दिली आहे. शिवसेनेचे नेते तथा माजी आमदार चंद्रकांत रघुवंशी यांचे पुत्र राम रघुवंशी यांनी पुन्हा कोपरली गटातून निवडणूक लढवली आहे. यामुळे जिल्ह्यातील तिन्ही प्रमुख नेत्यांची प्रतिष्ठा पणाला लागली आहे. यामध्ये कोण वर्चस्व राखेल, हे थोड्याच वेळात स्पष्ट होणार आहे.

Edited By- Digambar Jadhav