विश्वभूषण लिमये

उस्मानाबाद : दहावीत (10th) 90 टक्क्यांपेक्षा अधिक गुण मिळवणाऱ्या SC विद्यार्थ्यांना 2 लाखांची मदत करण्याची घोषणा राज्याचे सामाजिक न्याय मंत्री धनंजय मुंडे (Dhananjay Munde) यांनी केली आहे. उस्मानाबादेत आयोजित एक कार्यक्रमात त्यांनी ही घोषणा केली आहे. डॉ. बाबासाहेब आंबेडकर यांच्या नावाने बार्टीमार्फत 10 वीच्या परीक्षेत 90 टक्के किंवा त्याहून अधिक गुण प्राप्त केलेल्या आर्थिक दुर्बल घटकांतील विद्यार्थ्यांना ही मदत केली जाणार आहे. (2 lakh help to students who get more than 90 percent marks in 10th)

याबाबत बोलताना धनंजय मुंडे यांनी याबाबत माहिती दिली आहे. 11 वी व 12 वी या दोन वर्षात व्यावसायिक शिक्षणाच्या पूर्वतयारीसाठी प्रत्येकी 1 लाखप्रमाणे एकूण 2 लाख रुपयांचे अनुदान दिले जाईल. राज्य सरकारने डॉ. बाबासाहेब आंबेडकर यांच्या नावानं बार्टीमार्फत हे अनुदान देण्याचा निर्णय घेतला आहे. मात्र विद्यार्थ्याना योजनेचा लाभ मिळण्यासाठी पालकांचे वार्षिक उत्पन्न 2.5 लाख पेक्षा कमी असणे आवश्यक आहे. बार्टीच्या नियामक मंडळाची बैठकीत हा निर्णय घेण्यात आला आहे.

असंघटित क्षेत्रातील कामगार, कंत्राटी किंवा खाजगी क्षेत्रातील कामगारांच्या कुटुंबातील विद्यार्थ्यांना उच्च शिक्षणाची पूर्वतयारीसाठी ही योजना तयार करण्यात आली आहे. डॉ. बाबासाहेब आंबेडकर संशोधन व प्रशिक्षण संस्थेकडे (बार्टी) या योजनेची अंमलबजावणी करण्याची जबाबदारी असेल, असेही धनंजय मुंडे यांनी म्हटले आहे.