परांडा विधानसभा मतदारसंघात शिवसेना शिंदे गटाला मतदारांची पसंती मिळण्याची शक्यता आहे. सकाळच्या एक्झिट पोलच्या आकडेवारीनुसार या ठिकाणी संभाव्य आमदार म्हणून तानाजी सावंत यांना मतदारांची पसंती मिळताना दिसत आहे.

परांड्यात शिंदे गट विरुद्ध राष्ट्रवादी शरद पवार गट अशी लढत रंगली आहे. शरद पवार यांच्या गटकडून याठिकाणी राहुल मोटे यांना उमेदवारी देण्यात आलेली आहे. परांडा मतदारसंघात तानाजी सावंत यांचा जनसंपर्क चांगला आहे. पालकमंत्री असल्याने त्यांनी केलेल्या विकास कामामुळे देखील त्यांना मतदारांकडून पसंती मिळत आहे.

उमेदवारी जाहीर झाल्यानंतर तानाजी सावंत यांनी मतदारसंघातील प्रत्येक गावात प्रचार दौरे करत मतदारांच्या भेटी घेतल्या आहेत. दुसरीकडे राष्ट्रवादी शरद पवार गटाचे राहुल मोटे हे तीन वेळा अंदर राहिले आहेत. मात्र 2019 मध्ये त्यांना पराभव पत्करावा लागला आहे. त्यांना यावेळी उमेदवारी मिळाली असली तरी त्यांच्या उमेदवारीबाबत महाविकास आघाडीत तिढा निर्माण झाला होता.

मविआमध्ये शरद पवार यांच्या पक्षाबरोबरच शिवसेना ठाकरे गट देखील ही जागा लढवण्यास आग्रही होती. ठाकरे गटाकडून रणजित पाटील यांना एबी फॉर्म देण्यात आला होता. शेवटच्या दिवसापर्यंत हा तिढा कायम राहिला, त्यामुळे याचा फटका याठिकाणी आता महाविकास आघाडीला बसण्याची शक्यता आहे.