सचिन गाड, मुंबई

लोकसभा निवडणुकीमध्ये (Loksabha Election 2024) आपला उमेदवार निवडून यावा यासाठी सर्वच पक्षांकडून जोरदार प्रयत्न सुरू आहेत. अनेक ठिकाणी प्रचार सभा आणि बैठकांचे आयोजन केले जात आहे. अशामध्ये मुंबईमध्ये एका अपक्ष उमेदवाराला उमेदवारी अर्ज मागे घेण्यासाठी धमकी दिल्याचे प्रकरण समोर आले आहे. याप्रकरणी शिवसेना शिंदे गटाच्या (Shivsena Shinde Group) पदाधिकाऱ्यांविरोधात गुन्हा दाखल करण्यात आला आहे.

मिळालेल्या माहितीनुसार, मुंबई दक्षिण मतदारसंघातील (Mumbai South Constituency) अपक्ष उमेदवार प्रशांत घाडगे यांना उमेदवारी अर्ज मागे घेण्यासाठी धमकी देण्यात आली. याप्रकरणी शिवसेना शिंदे गटाच्या विभागप्रमुख आणि पक्ष सचिवाविरोधात गुन्हा दाखल करण्यात आला आहे. कफ परेड पोलिस ठाण्यात हा गुन्हा दाखल करण्यात आला आहे. उमेदवारी अर्ज मागे घेण्यासाठी २ ते ५ लाखांचे आमीष दिल्याचे तक्रारीमध्ये म्हटले आहे. या घटनेमुळे एकच खळबळ उडाली आहे.

मतांचे विभाजन टाळण्यासाठी उमेदवारी अर्ज मागे घेण्यासाठी अपक्ष उमेदवार प्रशांत घाडगे यांच्यावर दबाव टाकण्यात आला असल्याची माहिती समोर आली आहे. मुंबई दक्षिण मतदारसंघातून आमदार यामिनी जाधव या शिवसेना शिंदे गटाकडून निवडणुकीच्या रिंगणात उतरल्या आहेत. याच मतदारसंघामध्ये प्रशांत घाडगे हे अपक्ष म्हणून निवडणूक लढवत आहेत. या मतदारसंघात ठाकरे गटाकडून अरविंद सावंत निवडणुकीच्या रिंगणात उतरले आहेत. या मतदारसंघामध्ये यामिनी जाधव विरुद्ध अरविंद सावंत यांच्यात प्रमुख लढत होणार आहे.

दरम्यान, दक्षिण मुंबई मतदारसंघामध्ये कुलाबा, मुंबादेवी, मलबार हिल, वरळी, भायखळा आणि शिवडी या सहा विधानसभा मतदारसंघांचा समावेश आहे. सहापैकी तीन मतदारसंघात शिवसेना, दोन मतदारसंघामध्ये भाजप आणि एका मतदार संघामध्ये काँग्रेसचे आमदार आहेत. या मतदारसंघामध्ये आपला उमेदवार निवडून यावा यासाठी ठाकरे गट आणि शिंदे गट यांनी आपली ताकद पणाला लावली आहे. या मतदारसंघात दोन्ही पक्षांसाठी ही निवडणूक प्रतिष्ठेची असणार आहे.