Manoj Jarange News :

लोकसभा निवडणुकीत उमेदवार देणार नाही, अशी घोषणा मराठा आंदोलक मनोज जरांगे पाटील यांनी केली आहे. आपल्याला राजकारणापेक्षा आरक्षण महत्वाचं आहे. अलीकडच्या 6 दिवसात आरक्षण विषयापेक्षा राजकारणच जास्त झालं आहे. राजकारण करू नका, या मताचा मी नाही. पण आरक्षण विषय बाजूला जाऊ देऊ नका, असं आवाहन मनोज जरांगे पाटील यांनी मराठा बांधवांना केलं.

अनेक तालुक्यात मराठा बांधवांनी परस्पर बैठका घेतल्या. या बैठकांची खेड्या-पाड्यातील बांधवांना कुणालाही कल्पना नाही. परस्पर उमेदवार निश्चित करून मला अहवाल दिला, हे बरोबर नाही. अहवाल तयार करताना काही जणांनी मनमानी केली. सह्या देखील स्वतःच्या ठोकल्या.

आपल्या रक्तात राजकारणापेक्षा आरक्षण ठेवा. महाराष्ट्रात अनेक गावांत मराठा बांधव पोहचले नाही. राजकारण हे समाजापेक्षा मोठं नाही. राजकारणापायी मी समाजाच वाटोळं होऊ देणार नाही, असं मनोज जरांगे पाटील यांनी म्हटलं.

राजकारणाने आपलं वाटोळं होईल, तुमच्या रक्तात आरक्षण भिनू द्या. जर सग्या-सोयऱ्याची अंमलबजावणी झाली नाही तर विधानसभा निवडणुकीत धिंगाणाच आहे. मराठ्यांना आरक्षण मिळवून देण्यास मी खंबीर आहे.

माझ्याकडे आलेल्या अहवालावरून मला उमेदवार देता येणार नाही. अपक्ष उमेदवार मी देणार नाही. ज्याला पाडायचं त्याला पाडा. ज्याला निवडून द्यायचं त्याला द्या. जो सगे-सोयरे कायद्याला पाठिंबा देईल, त्याला मतदान करा बाकीच्यांना पाडा. विधानसभा निवडणुकीची तयारी करा, असं देखील मनोज जरांगे पाटील यांनी मराठा बांधवांना सांगितलं.