Maharashtra Lok Sabha Election 2024

महाविकास आघाडी आणि महायुतीतील ४ प्रमुख उमेदवारांना निवडणूक निर्णय अधिकाऱ्यांकडून नोटीसा बजावण्यात आल्या आहेत. खर्चात तफावत आढळून आल्याने या नोटीसा बजावण्यात आल्या आहेत. ४८ तासांत नोटीसीला उत्तर द्यावं, अन्यथा खर्चातील तफावत तुम्हाला मान्य आहे असं समजलं जाणार, असंही नोटीसीत मांडण्यात आलं आहे.

महाविकास आघाडीचे शिरुर लोकसभेचे उमेदवार अमोल कोल्हे, पुणे लोकसभा मतदारसंघाचे रविंद्र धंगेकर, महायुतीचे उमेदवार शिवाजीराव आढळराव पाटील आणि मुरलीधर मोहोळ यांना निवडणूक निर्णय अधिकाऱ्यांनी नोटीसा बजावल्या आहेत.

लोकसभा निवडणुकीतील चौथ्या टप्प्यातील पुणे आणि शिरूर लोकसभा मतदारसंघातील उमेदवारांच्या प्रचार खर्चाची पहिली तपासणी ३ मे रोजी पार पडली. ⁠त्यानुसार उमेदवारांकडे असलेल्या दैनंदिन खर्चाच्या नोंदवहीत आणि निवडणूक विभागाकडे असलेल्या शॅडो रजिस्टरमध्ये तफावत आढळून आली आहे.

शिरूर लोकसभा मतदारसंघातील महायुतीचे उमेदवार आढळराव पाटील यांच्याकडून १९ लाख ६२ हजार १६० रुपये खर्च दाखविण्यात आला आहे, तर निवडणूक विभागाच्या नोंदवहीत ४३ लाख ९० हजार ८१ रुपये खर्च झाल्याची नोंद केली आहे. त्यामुळे आढळराव यांच्या हिशोबात २४ लाख २७ हजार ९२१ रुपयांची तफावत असल्याचे निष्पंन्न झाले आहे.

दुसरीकडे महाविकास आघाडीचे अमोल कोल्हे यांनी १५ लाख ६७ हजार ३६८ रुपये खर्च सादर केला आहे. तर, निवडणूक विभागाकडून ३५ लाख २२ हजार ८७१ रुपयांचा खर्च नोंदवला आहे. कोल्हे यांच्या हिशोबात १३ लाख ५४ हजार ३ रुपये इतक्या खर्चाची तफावत आहे.

⁠पुणे लोकसभा मतदारसंघातील महायुतीचे उमेदवार मोहोळ यांनी ३३ लाख १३ हजार ४०२ रुपयांचा खर्च दाखवला आहे. त्यांचा जवळपास २७ लाख २४ हजार २३२ रुपयांचा हिशोब जुळत नसल्याचे समोर आले आहे. ⁠तर महाविकास आघाडीचे धंगेकर यांच्या खर्चचा हिशेबही आयोगाच्या रजिस्टर सोबत जुळत नाही.

⁠त्यामुळे या चारही प्रमुख उमेदवारांना निवडणूक निर्णय अधिकारी यांनी त्यांना नोटीस पाठवली आहे. येत्या ४८ तासाच्या आत या नोटीसीला उत्तर द्यावं, अन्यथा खर्चातील तफावत उमेदवारांना मान्य आहे असं समजलं जाणार, असं नोटीसीत मांडण्यात आलं आहे.