अजय सोनवणे, नाशिक, ता. ४ जून २०२४

राज्यातील लोकसभा निवडणुकांचे निकाल हाती येत असून निवडणुकीत भारतीय जनता पक्षाला मोठा धक्का बसल्याचे दिसत आहे. भारतीय जनता पक्षाच्या दिंडोरी लोकसभेच्या उमेदवार केंद्रिय मंत्री भारती पवार यांचा महाविकास आघाडीचे उमेदवार भास्कर भगरे यांनी लाखोंच्या मतांनी पराभव करत जायंट किलरची भूमिका निभावली आहे.

राज्यातील लोकस निवडणुकांचे अनेक धक्कादायक निकाल समोर येत आहेत. दिंडोरी लोकसभा मतदार संघात भारतीय जनता पक्षाच्या उमेदवार केंद्रिय राज्यमंत्री भारती पवार यांचा महाविकास आघाडीचे उमेदवार भास्कर भगरे यांनी तब्बल एका लाखांहून अधिक मतांनी पराभव केला आहे.

दिंडोरीमध्ये राष्ट्रवादी काँग्रेस शरदचंद्र पवार पक्षाचे उमेदवार भास्कर भगरे विरुद्ध भारती पवार अशी लढत झाली. या लढतीत भास्कर भगरे यांनी सुरूवातीपासून बाजी मारत केंद्रिय राज्यमंत्र्यांचा पराभव करण्याचा पराक्रम केला आहे. भारतीय जनता पक्षासाठी हा सर्वात मोठा धक्का मानला जात आहे.

दरम्यान, नाशिकसह दिंडोरी परिसरात कांद्याच्या प्रश्नावरुन शेतकऱ्यांची केंद्र सरकारविरोधात नाराजी होती. केंद्र सरकारने घेतलेल्या कांदा निर्यातबंदीच्या निर्णायावरुन शेतकऱ्यांमध्ये रोष पाहायला मिळाला होता. याचाच सर्वात मोठा फटका भारती पवार यांना बसल्याचे दिसत आहे. विशेष म्हणजे भाजपचे रावसाहेब दानवेही पराभवाच्या छायेत आहेत.