Nana Patole On Vishal Patil:

>> अक्षय गवळी

एक मोठी राजकीय बातमी समोर आली आहे. सांगली लोकसभा मतदारसंघात बंडखोरी करणाऱ्या विशाल पाटलांवर काँग्रेस आता कारवाई करणार, अशी माहिती स्वतः काँग्रेस प्रदेशाध्यक्ष नाना पटोले यांनी दिली आहे.

विशाल पाटील यांची मनधरणी करण्याचे खुप प्रयत्न केलेत. मात्र, त्यांना कुणीतरी फुस लावली आहे. विशाल पाटलांवर कारवाईसाठी प्रदेश काँग्रेसची 25 एप्रिलला बैठक होणार आहे. या बैठकीनंतर विशाल पाटील यांच्यावरील कारवाईचं स्वरूप स्पष्ट होणार आहे. अकोल्यात डॉ. अभय पाटील यांच्या प्रचारसभा आटोपल्यानंतर माध्यमांशी बोलताना नाना पटोले यांनी यांबाबत माहिती दिली आहे.

विशाल पाटील निवडणूक लढवण्यावर ठाम

दरम्यान, काँग्रेसचे बंडखोर उमेदवार विशाल पाटील यांनी आपलं बंड कायम ठेवलंय. त्यांनी आपला उमेदवारी अर्ज मागे घेतला नाही आणि घेणार नाही, असं ठामपणे सांगितलं आहे. आज पत्रकार परिषद घेत ते म्हणाले आहेत की, 'हा जनतेचा लढा आहे. त्यामुळे माघार हा पर्याय नाही.'

विशाल पाटील म्हणाले की, 'काँग्रेस पक्षाचे नेतृत्व गेली ९० ते ९५ वर्षे काँग्रेससाठी राबणाऱ्या पक्षाला आणि जिल्ह्याला न्याय देतील अशी अपेक्षा होती. शेवटच्या क्षणापर्यंत प्रयत्न केला पण एबी फॉर्म आला नाही. त्यामुळे अत्यंत दु:ख वाटले. त्यानंतरही आशा होत्या की, ज्या उमेदवाराला महाविकास आघाडीकडून उमेदवारी जाहीर केली होती. त्या उमेदवाराला सर्व वस्तुस्थिती समजावून सांगत माघारीच्या आजच्या शेवटच्या दिवसापर्यंत तो अर्ज काढून घेऊन महाविकास आघाडीचा पुरस्कृत उमेदवार म्हणून माझे नाव जाहीर करतील ही अपेक्षा होती. पण तेही आज झाले नाही. १६ तारखेला कार्यकर्त्यांनी सांगितले होते की माघार हा पर्याय नाही'.

दरम्यान, विशाल पाटील यांचा अपक्ष उमेदवारी अर्ज कायम राहिला आहे आणि त्यांना लिफाफा हे चिन्ह मिळाले आहे. त्यानंतर विशाल पाटील समर्थकांनी विशाल पाटलांच्या वसंतदादा भवन कार्यालयासमोर एकच जल्लोष केला आहे. हातात लिफाफा घेऊन कार्यकर्त्यांनी घोषणा दिल्या आहेत. दिसला लिफाफा मार शिक्का आणि आणि विशाल पाटलांच्या विजयाची घोषणाबाजी करण्यात करण्यात आली आहे.