सागर आव्हाड, पुणे|ता. ७ मे २०२४

राज्यभरातील ११ लोकसभा मतदार संघांमध्ये आज तिसऱ्या टप्प्यात मतदान होत आहे. सकाळपासूनच लोक मतदान केंद्रांवर गर्दी करताना दिसत आहेत. या निवडणुकीत आत्तापर्यंत विरोधात असलेले अनेक पक्ष एकत्र असल्याने उमेदवाराचे चिन्ह शोधताना मतदारांची दमछाक होत आहे. अशातच ईव्हीएम मशिनवर कमळ चिन्हचं नसल्याने मतदानासाठी आलेले आजोबा चांगलेच संतापल्याचा प्रकार पुण्यात घडला. नेमकं काय आहे प्रकरण, जाणून घ्या.

नेमकं काय घडलं?

शिवसेना अन् राष्ट्रवादीच्या फुटीनंतर राज्याचे राजकारणाचे चित्र पुर्णपणे बदलून गेले. पिढ्यानपिढ्या एकमेकांच्या विरोधात असलेले नेते आता गळ्यात गळे घालून फिरताना दिसत आहेत. या राजकीय युत्यांमुळे जशी कार्यकर्ते पदाधिकाऱ्यांची गोची झाली तसाच मतदार राजाही गोंधळल्याचे चित्र पाहायला मिळत आहे. असाच प्रकार पुण्यातील धायरीच्या मतदान केंद्रावर घडला.

पुण्यातील धायरीच्या काका चव्हाण शाळेतील मतदान केंद्रावर हे आजोबा मतदानासाठी आले होते. भाजपच्या पारंपारिक मतदार असलेल्या आजोबांना ईव्हीएमवर कमळ चिन्ह न दिसल्याने ते चांगलेच संतापल्याचे पाहायला मिळाले. बारामतीत महायुतीचा उमेदवार असलेल्या सुनेत्रा पवार या घड्याळ चिन्हावर लढत आहेत. त्यामुळे ईव्हीएमवर कमळ चिन्ह देण्यात आले नाही, यावरुनच या आजोबांनी संताप व्यक्त केला आणि थेट मतदान अधिकाऱ्यांशी वाद घातला.

दरम्यान, राष्ट्रवादीचे नेते शरद पवार यांनीही सकाळीच आपला मदतानाचा हक्का बजावला. बारामती लोकसभा मतदार संघात महायुतीकडून सुनेत्रा पवार विरुद्ध महाविकास आघाडीच्या सुप्रिया सुळे यांच्यामध्ये लढत होत आहे. इतिहासात पहिल्यांदाच पवार विरुद्ध पवार असा सामना होत असल्याने संपूर्ण देशाचे लक्ष या लढतीकडे लागले आहे.