आपण आजारी असलो की शरीर आपल्याला काही ना काही इशारे देत असतं. पण अनेकदा असं होतं की, आपण त्या लक्षणांकडे दुर्लक्ष करतो. पण नखांचा रंग बदलणं हा त्यापैकीच एक महत्त्वाचा इशारा असू शकतो. विशेषतः नखं निळसर दिसायला लागली तर ही बाब हलक्यात घेऊ नका.

हैदराबादमधील यशोदा रूग्णालयाच्या वरिष्ठ जनरल फिजिशियन डॉ. विघ्नेश यांनी सांगितलं की, नखं निळी पडण्यामागे मुख्य कारण म्हणजे शरीरात ऑक्सिजनची कमतरता किंवा बोटांपर्यंत रक्तपुरवठा नीट न होणं. वैद्यकीय भाषेत या अवस्थेला Cyanosis असं म्हणतात.

नखं निळी का पडतात?

डॉक्टरांच्या म्हणण्यानुसार, नखांचा रंग निळा होण्यामागे अनेक कारणं असू शकतात.

थंडीमुळे होणारा परिणाम

हिवाळ्यात किंवा खूप थंड वातावरणात बोटांच्या नसांमध्ये आकुंचन येतो. त्यामुळे काही काळासाठी रक्तप्रवाह कमी होतो आणि नखं थोडी निळसर दिसू शकतात. साधारणपणे शरीर उबदार झाल्यावर ही समस्या आपोआप कमी होते. मात्र ही स्थिती वारंवार होत असेल किंवा बराच वेळ टिकत असेल, तर त्याकडे दुर्लक्ष करू नये

हृदयाशी संबंधित समस्या

काही वेळा हार्ट अटॅक असलेल्या व्यक्तींमध्येही नखं निळी दिसू शकतात. कारण हृदय व्यवस्थित ऑक्सिजनयुक्त रक्त शरीरात पंप करू शकत नाही. अशावेळी नखांचा रंग बदलणं हा एक महत्त्वाचा संकेत असू शकतो.

फुफ्फुसांचे आजार

अस्थमा, सीओपीडी किंवा इतर श्वसनाच्या समस्या असल्यास श्वास घेण्यास अडचण येते. त्यामुळे शरीराला पुरेसा ऑक्सिजन मिळत नाही आणि त्याचा परिणाम नखांच्या रंगावर दिसून येतो. ही लक्षणं दीर्घकाळ दुर्लक्षित करणं धोकादायक ठरू शकतं.

हिमोग्लोबिन

हिमोग्लोबिन कमी असणं किंवा इतर रक्ताचे विकार असतील, तर शरीरात ऑक्सिजन योग्य प्रकारे पोहोचत नाही. अशावेळी नखं निळसर दिसू शकतात.

फक्त एकच नख निळं का पडतं?

काही वेळा फक्त एकाच बोटाचं नख निळं दिसतं. अशावेळी त्यामागे साधं कारण म्हणजे दुखापत असू शकते. बोट दाबलं जाणं, घट्ट बूट घालणं किंवा नखाखाली रक्त साचणं यामुळे नख निळं किंवा काळसर दिसू शकतं.

काळजी करण्याची परिस्थिती

जर एकाच वेळी अनेक नखं किंवा संपूर्ण हात निळा पडत असेल आणि त्यासोबत चक्कर येणं, छातीत दुखणं किंवा श्वास घेण्यास त्रास होत असेल, तर ही स्थिती गंभीर असू शकते. अशावेळी त्वरित डॉक्टरांचा सल्ला घेणं अत्यंत गरजेचं आहे.