WhatsApp Hack Alert : जगभरातील अनेक देशांमधील व्हॉट्सअ‍ॅप यूजर्सवर एका स्पायवेयर हल्ला झाला आहे. इटलीमध्ये सात ते आठ यूजर्सचे व्हॉट्सअ‍ॅप हॅक झाले होते. त्यानंतर त्या देशाने या संदर्भात तपास करायला सुरुवात केली. पॅरागॉन सॉल्यूशन्स या इस्राईलच्या सर्विलन्स कंपनीशी निगडीत स्पायवेयरचा वापर करुन पत्रकार, सामाजिक कार्यकर्ते आणि सिव्हिल सोसायटी सदस्यांना लक्ष्य करण्यात आल्याची माहिती समोर आली आहे.

पॅरागॉन स्पायवेअर कंपनी विविध देशांना स्पायवेयर सिस्टीम विकते. राष्ट्रीय सुरक्षा आणि गुन्हेगारीवर मात करण्यासाठी या स्पायवेअरचा वापर केला जातो. या स्पायवेअरमुळे काही यूजर्सचे डिव्हाइस हॅक केल्याचा दावा व्हॉट्सअ‍ॅपने केला आहे. व्हॉट्सअ‍ॅपच्या अधिकाऱ्यांनी रॉयटर्सला या संदर्भात माहिती दिली. तब्बल ९० यूजर्सचे व्हॉट्सअ‍ॅप हॅक करण्याचा प्रयत्न केल्याचे कंपनीने रॉयटर्सला सांगितले.

झिरो-क्लिक हॅक म्हणजे काय?

यूजर्सचे व्हॉट्सअ‍ॅप हॅक करण्यासाठी पॅरागॉन कंपनीच्या स्पायवेअरचा वापर करण्यात आला. याचा अर्थ यूजरने कोणत्याही लिंकवर क्लिक न करताही त्याचे व्हॉट्सअ‍ॅप हॅक केले गेले. झिरो-क्लिक अटॅक झाल्याने हॅकर्स कोणत्याही अडथळ्याशिवाय यूजर्सच्या मोबाइलमधील व्हॉट्सअ‍ॅप वापरु शकतात. यावरुन हा हल्ला किती भयानक आहे याचा अंदाज येतो.

व्हॉट्सअ‍ॅपच्या अधिकाऱ्यांनी हा झिरो-क्लिक अटॅक कोणावर करण्यात आला होता याची माहिती रॉयटर्सला देण्यास नकार दिला आहे. पण ज्यांनी हा हल्ला केला आहे, ते लोक वेगवेगळ्या देशांमध्ये आहेत. विशेषत: ते युरोपात असल्याचे अधिकाऱ्यांनी सांगितले. द गार्डियनने हॅकर्सनी पत्रकार, नेते आणि सामाजिक कार्यकर्त्यांवर झिरो क्लिक अटॅक झाला होता असे म्हटले आहे.