आपल्यापैकी अनेक जणांना भरपूर राग येतो. राग एखाद्या व्यक्तीच्या नाकावर असतो, असं म्हणताना तु्म्ही ऐकलं असेल. जास्त राग किंवा संतापणं योग्य नाही. मात्र तुम्हाला माहितीये का तुमचं हे रागावणं आणि चिडचिड तुम्हाला आजारी पाडतंय. राग ही एक अशी भावना आहे जी एखाद्या व्यक्तीवर मानसिक आणि शारीरिक परिणाम करू शकते. फक्त २ मिनिटांचा राग तुमच्या शरीराला अनेक तासांपर्यंत हानी पोहोचवू शकतो, असं एका संशोधनातून समोर आलं आहे.

जर्नल ऑफ बिहेवियरल मेडिसिनमध्ये प्रसिद्ध करण्यात आलेल्या एका अभ्यासानुसार, केवळ एका मिनिटाचा राग तुमच्या रोगप्रतिकारक शक्तीला ५ तासांपर्यंत कमकुवत करू शकतो. या अभ्यासातून नेमकं काय समोर आलंय ते पाहूयात.

२ मिनिटांचा राग तुमच्या शरीरात काय बदल करतो?

जेव्हा एखाद्या व्यक्तीला राग येतो तेव्हा त्याच्या शरीरात 'कॉर्टिसॉल' नावाच्या हार्मोनची पातळी वेगाने वाढते. फक्त २ मिनिटं रागवल्याने तुमच्या शरीरात पुढील ७ तास कॉर्टिसोलची पातळी वाढून राहते. याचाच अर्थ राग हा केवळ तुमच्या तुमच्या मानसिक आरोग्यावर परिणाम करत नाही तर तुमचे शारीरिक आरोग्य देखील कमकुवत करतं.

कार्टिसोल हार्मोन म्हणजे नेमकं काय?

कॉर्टिसॉल हा एक स्ट्रेस हार्मोन असून जो शरीरातील विविध गोष्टींवर परिणाम करतो. यामध्ये चयापचय, रक्तदाब आणि रक्तातील साखर नियंत्रित करणं या महत्त्वाच्या गोष्टींचा समावेश आहे. जेव्हा कोर्टिसोलची पातळी वाढते तेव्हा तुमचे शरीर तणावाच्या स्थितीत जातं. परिणामी तुम्हाला शारीरिक आणि मानसिकदृष्ट्या कमकुवत वाटू शकते.

रोगप्रतिकारक शक्तीवर होतो परिणाम

राग आल्यानंतर तुमची रोगप्रतिकारक शक्ती ७ तासांसाठी कमकुवत होते. याचा अर्थ असा की, तुमचे शरीर संसर्ग आणि आजारांशी लढण्यात कमकुवत होतं. यामुळे तुम्हाला सर्दी, खोकला आणि इतर आजारांचा अगदी सहजरित्या त्रास होण्याची शक्यता असते.

झोपेवरही होतो परिणाम

रागाचा तुमच्या झोपेवरही परिणाम होत असतो. फक्त २ मिनिटांचा राग पुढील २४ तासांसाठी तुमच्या झोपेचं चक्र बिघडवू शकतं. याचाच अर्थ या कालावधीमध्ये तुम्हाला शांत झोप मिळू शकणार नाही.