पोटभर जेवलं की छान एक झोप काढण्याचं तुमचं मन होतं का? दुपारी जेवणानंतर झोपायची सवय तुम्हालाही आहे का? किंवा ऑफिसमधल्या थकव्यानंतर तुमच्याही डोळ्यावर झोप असते का? जर यांचं उत्तर होय असेल तर आता तुम्ही आता सावध होण्याची वेळ आलीये. याचं कारण म्हणजे आंतरराष्ट्रीय संशोधनात दावा करण्यात आला आहे की, दिवसा वारंवार किंवा जास्त झोप येत असेल तर ही ही सवय अकाली मृत्यूचा धोका तब्बल २०% ने वाढवते.

Sleep 2025 Conference मध्ये सादर करण्यात आलेल्या एका अभ्यासातून ही धक्कादायक माहिती समोर आलीये. या संशोधनात ८६,००० हून अधिक मध्यम वयाच्या व्यक्तींच्या झोपेच्या सवयी अनेक वर्षं ट्रॅक करण्यात आल्या. त्यामध्ये असं आढळून आलं की, ज्या व्यक्ती नियमितपणे दिवसा विशेषतः दुपारी झोपत होत्या त्यांच्यात वेळेपूर्वी मृत्यू होण्याचा धोका बऱ्यापैकी जास्त होता.

अभ्यास काय सांगतो?

या अभ्यासामध्ये सहभागी लोकांची झोप ‘अ‍ॅक्टिग्राफी’ नावाच्या डिव्हाइसने एक आठवड्यापर्यंत नोंदवण्यात आली. या अभ्यासातून असं दिसून आले की, दुपारी ११ ते १ दरम्यान झोप घेणाऱ्यांमध्ये ७% अधिक मृत्यू धोका होता. तर ज्या व्यक्ती अधिक वेळ आणि अनियमित झोप घेत होत्या त्यांच्यात हा धोका तब्बल २०% पर्यंत वाढलेला दिसून आला.

संशोधनाच्या लीड रिसर्चर प्रोफेसप चेनलू गाओ यांनी सांगितलं की, ही फक्त झोपण्याची सवय नसून आपण किती वेळ, कितीदा आणि कोणत्या वेळेस झोपतो, यावर आपल्या आरोग्याचं भवितव्य ठरतं. अनियमित झोप घेणाऱ्या लोकांमध्ये हृदयविकार, टाइप २ मधुमेह, नैराश्य आणि डिमेंशिया यांसारख्या गंभीर आजारांची शक्यता अधिक दिसून आली.

डॉक्टरांचं म्हणणं काय?

आरोग्य तज्ज्ञांच्या सांगण्यांनुसार, जर दिवसा वारंवार झोप येत असेल, तर ती केवळ थकवा नसून शरीरातील एखाद्या गंभीर समस्येचा एक इशारा असू शकतो. त्यामुळे डॉक्टरांनी आता रात्रीच्या झोपेबरोबरच दिवसा घेतलेल्या झोपेचाही तपशील विचारावा, अशी शिफारस करण्यात आली आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत