सध्याची लाइफस्टाइल पुर्वी पेक्षा वेगळी आणि कमी मेहनीची झाली आहे. आता लोक कामात अनेक डिजीटल उपकरणांचा वापर करतात. त्यामुळे शारीरिक श्रम कमी झाले आहेत. त्यातच अनेकांना कामानिमित्त बराचवेळ घराबाहेर राहावं लागतं. मग लोक बाहेरचे अरबट चरबट पदार्थ खातात. त्याने त्यांच्या पोटाच्या दुखण्यांमध्ये वाढ होते. पण घरचं खाल्यानेही काहींना पोट दुखीच्या समस्यांना सामोरं जावं लागू शकतं.

बऱ्याचदा जेवल्यानंतर काहींच्या पोटात दुखतं. मग लोक अॅसिडीटी समजून त्यावर सोडा, ओवा खाऊन घरगुती उपचार करतात. पण हे दुखणं रोजचं असेल अजिबात त्याकडे दुर्लक्षित करु नका. ही गंभीर समस्या सुद्धा असू शकते.

तज्ज्ञांच्या मते, जेवल्यानंतर पोट दुखत असेल तर हे पचनाशी संबंधित समस्या असू शकते. अपचनामुळे किंवा जड जेवणामुळे पोटात दुखायला लागू शकतं. गॅस्ट्रोएसोफेजियल रिफ्लक्स रोग (GERD)मुळे पोटातले आम्ल हे वरच्या दिशेने वाढतं. त्याच कारणामुळे जळजळ आणि पोटात वेदना होतात. नाभीच्यावर या वेदना होतात.

Peptic ulcer मुळे पोटाच्या किंवा आतड्यांच्या आतील थरावर जखमा तयार होतात आणि जेवल्यानंतर वेदना वाढू शकतात. तसेच Irritable bowel syndrome (IBS) मुळे पोटदुखीसोबत गॅस, अतिसार किंवा बद्धकोष्ठतेची तक्रार दिसून येते.

पोटदुखीसोबत जडपणा, पोटफुगी, छातीत जळजळ, ढेकर, मळमळ किंवा उलट्यांची भावना जाणवू शकते. काहींना भूक न लागणे आणि थकवा देखील जाणवतो. ही लक्षणे सतत दिसत असतील तर ती शरीराचा इशारा असू शकतात. तज्ज्ञांच्या मते, वेळेवर आणि हळूहळू जेवणे, मसालेदार व तळलेले पदार्थ टाळणे आणि पुरेसे पाणी पिणे गरजेचे आहे. नियमित व्यायाम, ताण कमी ठेवणे आणि गरज भासल्यास डॉक्टरांचा सल्ला घेणे अत्यंत महत्त्वाचे आहे.