सध्याच्या बदलत्या जीवनशैलीमुळे अनेकांच्या झोपेच्या वेळा आणि पद्धती बदलल्या आहेत. बरीच मंडळी दिवसभर काम केल्यानंतर थकतात. त्यामुळे त्यांना बरेचदा काम करताना अचानक डुलकी येते, ते तिथेच झोपतात. काहीजण रात्रीच्या वेळी जागे राहून काम पूर्ण करतात. मग फोनचाही वापर मोठ्या प्रमाणात केला जातो.

त्यावेळेस त्यांना कधी झोप लागते हे कळतच. तुम्ही अशावेळेस आहात त्या अवस्थेत झोपता. तेव्हा कधीकधी एका कुशीवर किंवा हातावर झोपता. त्यावेळेस उठल्यानंतर तुमचा हात किंवा पाय सुन्न पडतो. ही समस्या जर खूप वेळा जाणवत असेल तर तो ब्रेन स्ट्रोकचा धोका असू शकतो. असं अमेरिकेतील न्यूरोसर्जन डॉ. ब्रायन होफलिंगर यांनी सोशल मीडियावर माहिती देताना सांगितले आहे.

मेंदूतील स्ट्रोक कसा ओळखावा याबाबत महत्त्वाची माहिती जाणून घेण्यासाठी पुढील बातमी नक्कीच वाचा. चेहरा, हातवर किंवा पायामध्ये अचानक बधिरपणा येणं किंवा अशक्तपणा जाणवणं, अचानक गोंधळल्यासारखं वाटणं, बोलताना अडचण येणे किंवा समजण्यात त्रास होणं ही स्ट्रोकची प्रमुख लक्षणं असतात. अशा लक्षणांकडे दुर्लक्ष न करता लगेचच डॉक्टरांकडे धाव घेणं योग्य ठरतं.

स्ट्रोक म्हणजे मेंदूकडे जाणारा रक्तपुरवठा अचानक कमी होतो किंवा थांबतो. त्यामुळे मेंदूला पुरेसे ऑक्सिजन आणि पोषण मिळत नाही. याने मेंदूच्या पेशींना इजा होते आणि मेंदूचं काही कार्य बिघडतं. सोप्या भाषेत सांगायचं तर, रक्तप्रवाह न झाल्यामुळे मेंदूचा एखादा भाग जखमी होतो किंवा त्या भागातील पेशी मृत होऊ शकतात.

स्ट्रोकची लक्षणे सहसा अचानक दिसून येतात. चेहऱ्याचा एक भाग खाली झुकणे, चेहऱ्यात सुन्नपणा जाणवणे, हात किंवा पायात अचानक कमजोरी येणे, स्पष्ट बोलता न येणे किंवा बोलणं पूर्णपणे बंद होणे, तसेच अचानक दृष्टी धूसर होणे किंवा दिसेनासे होणे ही महत्त्वाची चिन्हे आहेत. ही लक्षणे काही वेळातच गंभीर स्वरूप धारण करू शकतात. त्यात जर तुम्हाला उच्च रक्तदाब, मधुमेह यांसारखे आजार असतील तर तुम्हाला स्ट्रोकचा धोका वाढू शकतो. त्यामुळे अशा आजारांकडे किंवा काही सुक्ष्म लक्षणांकडे दुर्लक्ष करणं टाळावे.

टीप: ही माहिती केवळ जनजागृतीसाठी असून वैद्यकीय सल्ल्याचा पर्याय नाही. आरोग्याविषयी कोणताही प्रश्न असल्यास तज्ज्ञ डॉक्टरांचा सल्ला घ्यावा.