जीवनातील विविध व्याधी आजार, मानसिक ताण-तणाव आणि अन्य बऱ्याचशा समस्या योगा केल्याने दूर होतात. अशात सध्या कामात व्यस्त असल्याने अनेक व्यक्तींना स्वत:साठी आणि स्वत:च्या हेल्थसाठी अजिबात वेळ मिळत नाही. त्यामुळे लठ्ठपणाच्या समस्या जास्त वाढल्या आहेत. लठ्ठपणा जास्त वाढल्याने काही काळाने व्यक्तींना आजारही जडतात. त्यामुळे या आजारांपासून स्वत:चा बचाव करण्यासाठी योगा करणे फायदेशी आहे.

योगा केल्याने फक्त मानसिक नाही तर शारीरीक आरोग्य सुधारतं. तसेच ज्या व्यक्ती योगा करतात त्यांना शरीरावरील अतिरिक्त चरबी आणि बेली फॅट कमी करण्यास सुद्धा मोठी मदत होते. बेली फॅट कमी करण्यासाठी तुम्हाला योग्य आसने आणि आसने करण्याची योग्य पद्धत माहिती पाहिजे. त्यानेच तुम्हाला व्यवस्थित बारीक होता येईल.

पश्चिमोत्तानासन

पश्चिमोत्तानासन आसन अगदी सोपं आहे. मात्र तितकंच प्रभावी आणि उपयुक्त आहे. हे आसन करण्यासाठी सर्वात आधी जमिनीवर बसा. त्यानंतर पोटातून बेंड व्हा. तुम्हाला तुमचं डोकं पायांजवळ न्यायचं आहे. तसेच दोन्ही पाय दोन्ही हातांनी पकडायचे आहेत. हे आसन किमान १० मिनिटे ५ वेळा तरी केले पाहिजे. तरच तुम्हाला थोडाफार रिझल्ट दिसेल.

धनुरासन

पोटावरील चरबी कमी करण्यासाठी धनुरासन फार उपयुक्त आहे. धनुरासन करणे काही व्यक्तींना कठीण सुद्धा वाटू शकते. ज्या व्यक्तींचे ऑपरेशन आणि पोटाला टाके असतील अशा व्यक्तींनी हे आसन करू नये. यासाठी जमिनीवर पालथं झोपावं लागेल. त्यानंतर तुमचे पाय मागच्याबाजुने हातांनी उचलून घ्या. या पोजमध्ये फक्त तुमचं पोट जमिनीला टेकलेलं असतं. तसेच तुमचे पूर्ण शरीर हवेत असते. अशा पद्धतीने तुम्ही धनुरासन करू शकता.

भुजंगासन

भुजंगासन केल्याने बेली फॅटसह मान आणि पाठीवरील चरबी सुद्धा कमी होते. यामध्ये तुम्हाला पुन्हा एकदा जमिनीवर पालथं झोपावं लागेल. असे झोपल्यावर तुम्हाला तुमचे हात जमिनीवर टेकवून घ्यावे लागतील. हात जमिनीवर असल्यावर पुढे मानेपासून कमरेपर्यंतचा भाव वर उचलून घ्या. उलट दिशेने शरीर फिरल्याने पोटावरील चरबी कमी होण्यास मदत होते.