आजच्या धावपळीच्या आयुष्यात सकाळी उठल्यावर डोळ्यांभोवती सूज दिसणं ही अनेकांना साधी गोष्ट वाटते. पण डॉक्टरांच्या मते, हीच छोटी वाटणारी लक्षणं अनेकदा मोठ्या आजाराची सुरुवात असू शकतात. यामध्ये किडनीशी संबंधित समस्या असेल तर त्याची पहिले संकेत डोळ्यांभोवतीची सूज दिसून येतात.

डोळ्यांभोवती सूज म्हणजे किडनीचा इशारा?

सकाळी उठल्यावर डोळे सुजलेले दिसणं याला वैद्यकीय भाषेत 'पेरिऑर्बिटल पफीनेस' म्हणतात. ही स्थिती त्यावेळी निर्माण होते जेव्हा किडनीची फिल्टर करण्याची क्षमता कमी होऊ लागते. किडनीमधील नेफ्रॉन नीट काम करत नाहीत, तेव्हा शरीरातील प्रोटीन लघवीद्वारे बाहेर जाऊ लागतं. अशावेळी अल्ब्युमिन हे महत्त्वाचं प्रोटीन कमी होतं. हे प्रोटीन शरीरात पाणी योग्य ठिकाणी ठेवण्याचं काम करतं. जेव्हा ते कमी होतं तेव्हा शरीरातील द्रव टिश्यूमध्ये साचू लागतो आणि त्यामुळे चेहरा आणि डोळ्यांभोवती सूज दिसते.

सकाळीच सूज जास्त का दिसते?

रात्री झोपताना आपण सरळ झोपतो, त्यामुळे गुरुत्वाकर्षणामुळे शरीरातील द्रव पदार्थ चेहऱ्याजवळ विशेषतः डोळ्यांच्या खाली साचतो. म्हणून सकाळी उठल्यावर सूज जास्त दिसून येते. जसजसा दिवस पुढे जातो तसतसं हेच द्रव पायांकडे आणि घोट्यांकडे सरकतो. यामुळे डोळ्यांवरील सूज कमी झाल्यासारखी वाटते.

इतर कारणं कोणती आहेत?

डोळ्यांभोवती सूज येण्यामागे फक्त किडनीचं कारण नसतं. अनेकदा झोप पूर्ण न होणं, अॅलर्जी, जास्त मीठ खाणं किंवा शरीरात पाण्याची कमतरता यामुळेही ही समस्या दिसू शकते. पण ही सूज सतत राहतेय आणि त्यासोबत काही इतर लक्षणंही जाणवत असतील तर दुर्लक्ष करू नये.

काळजी कोणी घ्यावी?

ज्यांना डायबिटीज आहे, ज्यांचं ब्लड शुगर वाढलेल असतो किंवा कुटुंबात किडनीच्या आजाराचा इतिहास आहे अशा लोकांनी डोळ्यांभोवती आलेली सूज अजिबात दुर्लक्षित करू नये. कारण त्यांच्यासाठी ही लक्षणं किडनीच्या आजाराची सुरुवात असू शकते. किडनीचा संबंध हृदय आणि रक्तातील साखरेच्या नियंत्रणाशीही असतो.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.