Ganpati Special Recipe : लवकरच आपल्या लाडक्या बाप्पाचे आगमन घरोघरी होणार आहे. या दिवसात आपण बाप्पाला प्रसन्न करण्यासाठी त्याचा आवडीच्या काही पदार्थांचा आस्वाद घेणार आहोत. परंतु, आरोग्याकडे देखील आपल्याला लक्ष द्यायाला हवे.

आरोग्याच्या (Health) दृष्टीने पाहायला गेले तर आपण मखाणे हे शरीरासाठी खूप फायदेशीर आहे. मखाणे शरीराला पचण्यासाठी व वजन कमी करण्यासाठी अधिक चांगले आहेत. तसेच उच्च रक्तदाबापासून आराम, हाडे मजबूत करण्यासाठी, शरीरात रक्ताची कमतरता नाहीशी करण्यासाठी व मधुमेहांच्या (Diabetes) रुग्णांसाठी मखाणे खाणे उत्तम ठरेल. चला तर मग जाणून घेऊया युट्यूबच्या घरचा स्वाद पेजवरुन मखाण्याच्या मोदकाची रेसिपी

साहित्य -

मखाणे - ४ कप, १ कप साजूक तूप, १/२ कप डेसिकेटेड कोकोनट, २/३ कप गुळ, १/४ चमचा जायफळ पावडर, १ चमचा वेलदोडे, २०/२५ काजू आणि बादाम, सजवण्यासाठी पिस्त्याचे काप.

कृती -

प्रथम १ चमचा तुपामध्ये काजू आणि बादाम खरपूस भाजून घ्या. त्यानंतर १/४ कप साजूक तुपात मखाणे कुरकुरीत भाजून घ्या. साहित्य थोडे थंड झाले की, भाजलेले काजू , बदाम, मखाणे आणि वेलदोडे एकत्र मिक्सरला बारीक करून घ्या. आता उरलेले तूप आणि गुळ एकत्र गरम करून त्यात वाटलेले मखाण्याचे मिश्रण घाला. सर्व साहित्य चांगले एकजीव झाले की, गॅस बंद करावा. ( संपूर्ण कृती ही मंद गॅसवरच करावी. )मिश्रण थोडे थंड झाले की यात जायफळ खिसून घालावे आणि एकजीव करावे. आता मोदकाच्या साच्यात पिस्त्याचे काप रचावे आणि तयार मखाण्याचे मिश्रण भरून मोदक तयार करावे. हे मोदक २० दिवस आरामात टिकतात.