एका वयानंतर प्रत्येकाने त्याच्या रक्तातील साखरेचं प्रमाण तपासून पाहिलं पाहिजे. जर तुमची ब्लड शुगर लेवल 370 mg/dL किंवा त्यापेक्षा जास्त असेल तर डॉक्टरांच्या मते हा गंभीर इशारा मानला जातो. इतक्या जास्त प्रमाणातील ब्लड शुगर लेवल म्हणजे तुमचा मधुमेह नियंत्रणात नसल्याचे संकेत आहेत. ही परिस्थिती तुमच्या जीवावरही बेतू शकते.

यामुळे पुढे स्ट्रोक, डायबेटिक किटोअॅसिडोसिस (DKA) यांसारखी गंभीर स्थिती उद्भवू शकते. जास्त थकवा आणि मळमळ अशी लक्षणं दिसल्यास तातडीने डॉक्टरांची मदत घेतली पाहिजे.

एका वेबसाईटला माहिती देताना दिल्लीतील इंटरनल मेडिसिन विभागाचे लीड कन्सल्टंट डॉ. नरेंद्र सिंगला यांनी सांगितलं की, जर तुमच्या शरीरातील ब्लड शुगर लेवल 250 mg/dL पेक्षा जास्त असल्यास हायपरग्लायसेमिया निर्माण होऊ शकतो. अशावेळी आपत्कालीन उपचारांची गरज लागू शकते. तर ही पातळी 300 mg/dL पेक्षा जास्त असली तर डायबेटिक किटोअॅसिडोसिसची समस्याही निर्माण होऊ शकते. यामुळे हृदयाच्या समस्या असलेल्या व्यक्तींमध्ये ब्लॉकेज तयार होतात आणि हार्ट अटॅकचा धोका वाढतो.

रक्तातील साखर वाढण्यामागची कारणं

डॉक्टरांच्या सांगण्यानुसार, अधिकचा ताणतणाव, औषधं वेळेवर न घेणं, इन्फेक्शन होणं किंवा अयोग्य आहार ही त्यामागची सामान्य कारणं असतात. फक्त औषधांनी रक्तातील ब्लड शुगर काही प्रमाणात नियंत्रणात राहते. मात्र पण दीर्घकाळ नियंत्रण हवं असल्यास निरोगी सवयी आणि योग्य जीवनशैली आवश्यक आहे.

ब्लड शुगर खूपच वाढली तर काय करावं?

अचानक तुमच्या शरीरात ब्लड शुगरचं प्रमाण जास्त झाल्यास शरीरात पाण्याची कमतरता होणार नाही याची काळजी घ्यावी. तज्ज्ञांच्या म्हणण्यानुसार, भरपूर पाणी प्यायल्याने लघवीद्वारे जास्तीची ग्लुकोज बाहेर टाकण्यास मदत होते. त्याचप्रमाणे लघवीतील किटोन्स तपासण्यासाठी युरिन किटोन टेस्ट करणं महत्त्वाचं आहे.

या गोष्टी लक्षात ठेवा

जर ब्लड शुगर लेवल 370 mg/dL पेक्षा जास्तच राहिली तर तातडीने डॉक्टरांची मदत घ्या. अशावेळी इन्सुलिन किंवा औषधांचे डोस बदलावे लागू शकतात. तसंच खूप तहान लागणं, वारंवार लघवी होणं, दृष्टी धूसर होणं किंवा पोटात वेदना होणं अशी लक्षणे दिसल्यास उशीर न करता डॉक्टरांची मदत घ्यावी, असं डॉ. सिंगला यांनी सांगितलंय.