आपल्याला जाणवणाऱ्या प्रत्येक समस्येचं लक्षण शरीर आपल्याला देत असतं. आजकाल चुकीच्या जीवनशैलीमुळे अनेक आजार आपल्या मागे लागले आहेत. यामध्ये किडनीसंदर्भातील आजारांमध्येही वाढ झाली आहे. मात्र तुम्हाला माहितीये का जर तुमची किडनी खराब होत असेल तर त्याची लक्षणं तुमच्या पायांमध्ये दिसून येतात.

किडनी शरीरात खालच्या बाजूस नसल्या तरी, जेव्हा त्या नीट काम करत नाहीत, तेव्हा त्याचे काही संकेत पायांतून दिसायला लागतात. याची कोणती पाच लक्षणं तुम्ही ओळखली पाहिजेत ते पाहूयात. ही लक्षणं ओळखून तुम्ही वेळेत डॉक्टरांची मदत घेतली पाहिजे.

पायाच्या घोट्यांभोवती सूज येणं

जर संध्याकाळी पायांभोवती सूज दिसत असेल आणि त्यांच्या खुणा खोलवर जाणवत असतील, तर ही किडनी नीट काम करत नसल्याची सुरुवातीची खूण असू शकते. किडनीचं एक महत्त्वाचं काम म्हणजे शरीरातील अतिरिक्त मीठ आणि पाणी बाहेर टाकणं. जेव्हा या प्रक्रियेत अडथळा येतो, तेव्हा हे पाणी घोट्यांमध्ये साचायला लागतं. ही सूज इतर कारणांनीही येऊ शकते.

पायावर खाज येणं

जर पायावर सतत खाज येत असेल, विशेषत: पायाच्या मांडीखालच्या भागात आणि त्वचेला कोरडेपणा, पुरळ किंवा रॅश काहीच नसेल तर ही खाज शरीराच्या अंतर्गत कारणांमुळे होत असते. जेव्हा किडनी नीट साफ करत नाहीत तेव्हा रक्तात काही टॉक्सिन पदार्थ साचायला लागतात, ज्यामुळे ही खाज आतून निर्माण होते.

रात्री झोपेत पायात क्रॅम्प येणं

जर झोपेत किंवा विश्रांती घेत असताना पायात क्रॅम्प येत असतील किंवा स्नायू अचानक आकुंचन पावत असतील तर त्याचं कारण किडनीशी जोडलेलं असू शकतं. आपले स्नायू पोटॅशियम, सोडियम आणि कॅल्शियम यांचं संतुलन योग्य असल्यावरच नीट काम करतात.

पायांच्या त्वचेचा रंग बदलणं

पायाच्या बोटांवर किंवा टाचांभोवती जर हळूहळू काळसर किंवा निळसर रंग दिसायला लागला तर हे देखील किडनीचा लक्षण असू शकतं. किडनीची समस्या वाढू लागली की, शरीरातील रक्ताभिसरण कमी होतं आणि त्यामुळे पायांना पुरेसं ऑक्सिजन मिळत नाही. यामुळे त्या भागात सौम्य रंग बदल होतो.

पायांमध्ये सुन्नपणा जाणवणं

कधीही एकदम पाय सुन्न होणं, झिणझिण्या येणं किंवा सुई टोचल्यासारखं वाटणं असं होत असेल तर ते नसांच्या कार्यावर परिणाम होतोय याचा संकेत आहे. किडनी केवळ रक्त शुद्ध करत नाही, तर शरीरात इलेक्ट्रोलाइटचं संतुलन आणि नसांची निगा राखणं हे कामही करत असतात. जेव्हा हे संतुलन बिघडतं, तेव्हा नसांवर परिणाम होतो तेव्हा सुन्नपणा जाणवू शकतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत