आजकाल आपल्या आहारात अनेक तळलेले पदार्थ असतात. मात्र तुम्ही चवीसाठी खात असलेल्या खाद्यपदार्थांचा तुमच्या लिव्हरवर परिणाम होत असतो. अयोग्य जीवनशैली, चुकीच्या खाण्याच्या सवयी आणि हिपेटायटीस सारख्या इन्फेक्शनमुळे यकृताच्या कॅन्सरचं प्रमाण झपाट्याने वाढताना दिसतंय.

यामध्ये सर्वात मोठी समस्या म्हणजे लोकं लिव्हरच्या कॅन्सरच्या सुरुवातीच्या लक्षणांकडे दुर्लक्ष करतात. या समस्येला एक सामान्य समस्या मानतात. यामुळे कॅन्सरचं गंभीर स्वरूपात निदान होतं. याची सुरुवातीची लक्षणं काय आहेत ते पाहूयात.

मेयो क्लिनिकच्या मते, लिव्हरच्या कॅन्सरची अनेक लक्षणं असू शकतात. मात्र याची ४ लक्षणं अशी आहेत जी तुम्ही ओळखू शकता

वेदना आणि सूज

जर तुम्हाला तुमच्या पोटाच्या उजव्या बाजूला विशेषतः बरगड्यांच्या खाली सतत सौम्य वेदना, दाब किंवा सूज येत असेल तर त्याला गॅस किंवा आम्लता समजून दुर्लक्ष करू नका. ही वेदना तेव्हा होते जेव्हा लिव्हरमध्ये ट्यूमरमुळे मोठा होतो. अशावेली पोटात द्रव जमा झाल्यामुळे वेदना जाणवतात.

वजन कमी होणं

जर तुमचं वजन कोणतंही डाएट किंवा व्यायामाशिवाय कमी होत असेल तर आणि तुमची भूक कमी होत असेल तर ही एक धोक्याची घंटा असू शकते. लिव्हरचा कॅन्सर शरीराच्या चयापचय प्रक्रियेवर परिणाम करतो. अशात जर एखाद्या व्यक्तीला लवकर पोट भरल्यासारखं वाटतं असेल आणि भूक कमी लागतं असेल तर डॉक्टरांची मदत घ्यावी.

कावीळ

कावीळ हे लिव्हरच्या कॅन्सरचं एक प्रमुख लक्षण मानण्यात येतं. त्यामुळे त्वचा, डोळ्यांचा पांढरा भाग आणि नखं पिवळी पडतात. ज्यावेळी लिव्हर योग्यरित्या काम करत नाही आणि रक्तातील बिलीरुबिनची पातळी वाढते तेव्हा हा बदल पाहायला मिळतो. गडद पिवळा किंवा तपकिरी लघवी आणि फिकट रंगाचा मल ही देखील कावीळी लक्षणं आहेत.

सततचा थकवा

जर तुम्हाला हलक्या कामानंतरही सतत थकवा आणि अशक्तपणा जाणवत असेल आणि विश्रांती घेतल्यानेही तो बरा होत नसेल तर याकडे गांभीर्याने पाहावं लागणार आहे. लिव्हरच्या कॅन्सरमुळे शरीराची ऊर्जा निर्माण करण्याची क्षमता कमी होते. अशावेळी तुम्हाला सतत थकवा जाणवतो.