श्रावणात उपवासाला मोठ्या प्रमाणात साबुदाण्याचे पदार्थ खाल्ले जातात. उदा. साबुदाणा खिचडी, वडे, थालीपीठ, खीर. पण सर्वात अधिक प्रमाणात साबुदाणा वडे खाल्ले जातात. कारण ते बनवायला सोपे असतात. तसचे खायला देखील चविष्ट लागतात. साबुदाणा वडे बनवायला सोपे आणि खायला रूचकर जरी असले तर ते छान फुगण्यासाठी काही गोष्टींची काळजी घेणे गरजेचे आहे. मगच साबुदाणा वड्यांचा स्वाद वाढतो. ही परफेक्ट रेसिपी फॉलो करून तुम्ही झटपट छान फुगलेले हॉटेल स्टाईल साबुदाणा वडे बनवू शकता.

खमंग, खुसखुशीत साबुदाणा वडा बनवण्यासाठी रेसिपी फॉलो करा

साहित्य

• साबुदाणा

• बटाटा

• हिरवी मिरची

• जिरे

• कोथिंबीर

• तेल

• मीठ

• शेंगदाण्याचं कूट

• सैंधव मीठ

कृती

उपवासाला खुसखुशीत साबुदाणा वडे बनवण्यासाठी सर्वप्रथम साबुदाणा पाण्याने स्वच्छ धुवून घ्या. एका भांड्यात थोडे पाणी आणि स्वच्छ केलेला साबुदाणा घालून सकाळसाठी रात्री साबुदाणा भिजत ठेवा. आता सकाळी पाहिलत तर तुम्हाला दिसेल की, साबुदाणा छान फुलून आला आहे. आता झटपट साबुदाणा वडा बनवण्यासाठी एका भांड्यात कुस्करून उकडलेला बटाटा, बारीक चिरलेली हिरवी मिरची, भाजलेल्या शेंगदाण्याचं कूट, चवीनुसार मीठ, जिरे, बारीक चिरलेली कोथिंबीर घालून सर्व साहित्य मस्त एकजीव करून घ्यावे. लक्षात ठेवा यात जास्तीचे पाणी टाकू नये. नाहीतर पीठ चांगले होणार नाही. यामुळे साबुदाणा वडे तळताना तेल फार पितील आणि नीट फुगणार देखील नाही. आता एका प्लास्टिक शीटवर तेल लावून वडे छान थापून घ्यावे. दुसऱ्या बाजूला पॅनमध्ये तेल गरम करून त्यात वडे खरपूस तळून घ्या. अशाप्रकारे कुरकुरीत साबुदाणा वडा तयार झाला.तुम्ही खोबऱ्याच्या चटणीसोबत याचा आस्वाद घेऊ शकता.