सध्याच्या धक्काधक्कीच्या जीवनाचा थेट तुमच्या झोपवर परिणाम होत असतो. कामाचा ताण, मोबाइल आणि लॅपटॉपचा अतिवापर, सोबत सततचा मानसिक ताण यामुळे अनेकांची झोप उडालेली असते. पण तुम्हाला माहित आहे का, सतत कमी झोप घेणे फक्त थकवा आणि डोकेदुखीच नव्हे तर गंभीर हृदय विकारालाही आमंत्रण देऊ शकते का? जाणून घ्या.

हृदयरोग तज्ज्ञ डॉ. शालिनी सिंग यांच्या मते, "झोप ही आपल्या शरीरासाठी औषधासारखी असते. झोपेत असताना शरीर दुरुस्तीच्या अवस्थेत जाते आणि हार्मोन्सचं संतुलन पुन्हा तयार होतात." म्हणजेच चांगली झोप ही शरीर आणि मनाच्या आरोग्यासाठी अत्यावश्यक आहे.

जेव्हा शरीराला पुरेशी झोप मिळत नाही, तेव्हा शरीरात अनेक जैविक बदल होतात. झोपेचा अभाव असल्यास रक्तदाब वाढण्याचा धोका निर्माण होतो. Stress Hormones वाढतात, त्यामुळे हृदयविकाराचा झटका येण्याचा धोका दुपटीने वाढू शकतो. झोपेचा अभाव रक्तातील साखरेचं प्रमाण बिघडवतो. मग डायबिडीज आणि नंतर हार्ट अटॅकचा धोका वाढतो.

कमी झोपेमुळे संपूर्ण शरीरावर नकारात्मक परिणाम होतो. सततचा थकवा, डोकेदुखी, एकाग्रतेचा अभाव, लठ्ठपणा वाढणे, रोगप्रतिकारक शक्ती कमी होणे आणि वारंवार सर्दी-खोकल्याचे त्रास हे सर्व झोपेच्या अभावामुळे होऊ शकतात.

आरोग्य टिकवण्यासाठी पुरेशी झोप घेणं अत्यंत आवश्यक आहे. यासाठी काही सवयींमध्ये बदल गरजेचा आहे. दररोज ठरलेल्या वेळी झोपणं आणि उठणं, झोपण्यापूर्वी मोबाइल, टीव्ही किंवा लॅपटॉपचा वापर टाळणं, हलका व्यायाम आणि योगांचा समावेश करणं, रात्री हलका व पौष्टिक आहार घेणं आणि झोपण्यापूर्वी ध्यान किंवा शांत संगीत ऐकणं याचा तुम्हाला भरपूर फायदा होईल.