किडनी आपल्या शरीरातील अत्यंत महत्त्वाचे अवयव आहेत. त्या रक्तातील टॉक्सिन पदार्थ बाहेर काढतात. यामुळे शरीरातील द्रवांचं संतुलन राखतात आणि काही महत्त्वाचे हार्मोन्स तयार करतात. सामान्यपणे लोकांना जन्मतः दोन किडनी असतात, पण काही लोकांना जन्मापासूनच एकच किडनी असते.

याशिवाय काही लोक आजार, अपघात किंवा इतर कारणांमुळे आयुष्यात एखाद्या टप्प्यावर एकाच किडनीसह राहतात. अशावेळी प्रश्न पडतो एक किडनी असली तर माणूस किती दिवस जगू शकतो? चला याबद्दल सविस्तर जाणून घेऊया.

एक किडनी असतानाही दीर्घकाळ जगणं शक्य?

अनेकांच्या मनात हा गैरसमज असतो की, एकच किडनी असेल तर आयुष्य कमी होऊ शकतं. पण एक किडनी असतानाही माणूस पूर्णतः निरोगी राहून आयुष्य जगू शकतो. याचं कारण म्हणजे शरीरात असलेली एक किडनी दोन्ही किडनींचं काम करण्यास सक्षम असते. या प्रक्रियेला कम्पेन्सेटरी हायपरट्रॉफी म्हणतात.

याचे सोपे उदाहरण म्हणजे, दरवर्षी हजारो लोक स्वतःची एक किडनी दान करतात आणि उरलेल्या एकाच किडनीच्या आधारावर ते संपूर्ण आयुष्य निरोगीपणे घालवतात. म्हणजेच एक किडनी असणं म्हणजे आजारपण किंवा आयुष्य कमी होणं असं नाही.

काही अडचणी संभवू शकतात

• साधारणपणे एक किडनी असलेल्या व्यक्तीला आयुष्यभर कोणतीही मोठी समस्या येत नाही. परंतु काही परिस्थितींमध्ये अडचणी निर्माण होऊ शकतात.

• एकच किडनी दोन्ही किडनींचे काम करत असल्याने त्यावर जास्त ताण येऊ शकतो.

• जर व्यक्तीला हाय ब्लड प्रेशर, डायबिटीज किंवा क्रॉनिक किडनी डिसीज असेल तर किडनीची कार्यक्षमता कमी होऊ शकते.

• काही वेळा माइल्ड प्रोटीन्यूरिया सारखी अवस्था दिसू शकते.

• या धोक्यांपासून वाचण्यासाठी नियमित तपासणी आणि निरोगी जीवनशैली अत्यंत महत्त्वाची आहे.

एक किडनी असताना आरोग्य कसं जपावं?

एकच किडनी असली तरी योग्य काळजी घेतल्यास आपण दीर्घकाळ निरोगी राहू शकतो.

• पुरेसे पाणी प्या

• संतुलित आहार घ्या

• मीठ आणि जास्त प्रोटीन टाळा

• नियमित व्यायाम करा

• धूम्रपान टाळा

• डॉक्टरांची नियमित तपासणी करा

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत