सकाळच्या वेळी उठल्याबरोबर चहा किंवा कॉफी पिणे हा अनेकांच्या दिनचर्येचा एक महत्त्वाचा भाग असतो. विशेषतः कॉफीप्रेमींसाठी दिवसाची सुरुवात एका कप कॉफीने होणे अत्यंत गरजेचे असते. काहींना ती दुधाची आवडते तर काहींना ब्लॅक कॉफी आवडते. मात्र, सकाळी रिकाम्या पोटी कॉफी पिणे आरोग्यासाठी फायदेशीर ठरते की धोक्याचे, हा एक महत्त्वाचा प्रश्न आहे.

अनेक संशोधनांनुसार, सकाळी उठल्यावर आधीच शरीरात अन्नाचे कण नसताना रिकाम्या पोटी कॉफी पिण्यामुळे पोटात ॲसिडिटी वाढू शकते. रात्री झोपून उठल्यानंतर आपल्या पोटातील आम्लाचे प्रमाण वाढलेले असते आणि अशा वेळी कॉफी प्यायल्याने पोटात जळजळ होणे, मळमळणे आणि अपचनाचा त्रास होऊ शकतो.

याशिवाय, कॉफीमधील कॅफिन आणि इतर घटकांमुळे पोटाच्या अस्तराचे नुकसान होऊ शकते, ज्यामुळे दीर्घकाळात पोटाचे आरोग्य बिघडू शकते. रिकाम्या पोटी कॅफिन घेतल्याने शरीरातील कॉर्टिसोल नावाच्या संप्रेरकाची पातळी वेगाने वाढते, ज्यामुळे तणाव आणि अस्वस्थता जाणवू शकते. बऱ्याच लोकांना यामुळे छातीत जळजळ किंवा ॲसिड रिफ्लक्सचा त्रास उद्भवतो. काही वेळा यामुळे शरीरातील आवश्यक पोषक घटकांचे शोषण होण्यातही अडथळा निर्माण होतो.

तज्ज्ञांच्या मते, जर तुम्हाला कॉफी पिण्याची सवय असेल आणि त्यामुळे शरीराला कोणताही त्रास होत नसेल, तर ती पूर्णपणे बंद करण्याची गरज नाही. परंतु, सकाळी उठल्याबरोबर थेट कॉफी पिण्याऐवजी आधी हलका नाश्ता करणे किंवा किमान एक ग्लास पाणी पिणे केव्हाही सोयस्कर ठरते.

नाश्ता केल्यानंतर किंवा नाश्त्यासोबत कॉफी घेतल्यास पोटावर अतिरिक्त ताण पडत नाही आणि ॲसिडिटीचा त्रास टाळता येतो. शरीराची योग्य काळजी घेण्यासाठी आणि पचनक्रिया निरोगी ठेवण्यासाठी सकाळी उठल्याबरोबर रिकाम्या पोटी कॉफी पिण्याची सवय बदलणे आरोग्याच्या दृष्टीने अधिक फायदेशीर ठरू शकते.