आपली ज्या देवावर श्रद्धा असते तो देव आपल्याला पृथ्वीच्या चराचरात दिसतो असं म्हणतात. भारतात गणपती बाप्पाचे अनेक भक्त आहेत. त्यामुळे हे भक्त जगभरात जिथे जिथे पोहचलेत तिथे तिथे गणरायाची सुंदर मंदिरे उभारण्यात आली आहेत. परदेशातही भारताप्रमाणे पुजारी बाप्पाची मनोभावे सेवा आणि पुजा करतात. त्यामुळे आज परदेशातील आपल्या लाडक्या गणरायाच्या मंदिरांची माहिती जाणून घेऊ.

श्रीलंकेतील मंदिर

श्रीलंका येथे गणपती बाप्पाचं एक प्रसिद्ध मंदिर आहे. येथे गणेशाची मनोभावे पुजा केली जाते. अरियालाई सिद्धिविनायककर मंदिर आणि कटारगामा मंदिर अशी या मंदिरांची नावे आहेत. श्रीलंकेतील गणरायाची ही सर्वाधिक प्रसिद्ध मंदिरे आहेत.

कसं जायचं?

अरियालाई सिद्धिविनायकर मंदिराला भेट देण्यासाठी तुम्हाला जाफना शहरात जावे लागेल. 5 किलोमीटर अंतर पार केल्यावर तुम्हाला A9 रोड दिसेल. या रस्त्याच्या पश्चिमेस अरियालाई सिद्धिविनायकर हे प्राचीन मंदिर आहे. 1918 च्या सुमारास अधिवक्ता अरुलमपालम यांनी या मंदिराची बांधणी केली आहे.

थायलंडमधील मंदिर

बाप्पा फक्त श्रीलंकेत नाही तर अगदी थायलंडमध्ये विराजमान झाला आहे. हुआई क्वांग स्क्वेअर नावाचं थायलंडमध्ये बाप्पाचं प्रसिद्ध मंदिर आहे. दरवर्षी लाखो भाविक बाप्पाच्या दर्शनासाठी येथे येत असतात. तसेच चियांग माई येथे बाप्पाची एक चांदीची मूर्ती आहे. त्यामुळे या मंदिराला चांदिचे मंदिर म्हणून सुद्धा ओळखले जाते.

मंदिराचा पत्ता काय?

P5PF+5RC, बंग तलत, ख्लोंग खुआन जिल्हा, चाचोएन्गसाओ,थायलंड असा या मंदिराचा पत्ता आहे.

नेपाळमधील मंदिर

नेपाळमध्ये गणपती बाप्पाचे अनेक भक्त आहेत. नेपाळच्या भक्तपूर जिल्ह्यामध्ये सूर्यविनायकाचे मंदिर आहे. हे मंदिर काठमांडूपासून सुमाने २ किलोमीटर इतक्या अंतरावर आहे. नेपाळमधील अनेक व्यक्ती येथे दर्शनासाठी येत असतात.

सूर्यविनायकाच्या मंदिरात कसे पोहचाल?

नेपाळमधील भक्तपूर जिल्ह्यात असलेल्या सूर्यविनायकाच्या मंदिरात जाण्यासाठी भक्तपूर किंवा काठमांडू येथे पोहचावे लागेल. तेथून पुढे तुम्ही रिक्षा किंवा कॅबच्या सहाय्याने या मंदिरापर्यंत पोहचू शकता. सूर्यविनायक मंदिर हे काठमांडूमधील गणपतीच्या प्रसिद्ध चार मंदिरांपैकी एक आहे.

नेदरलँडमधील गणपती मंदिर

नेदरलँडमधील डेन हेल्डरमध्ये येथे गणपती बाप्पाचं सर्वात जुनं मंदिर आहे. श्री वरथराजा सेल्वविनायगर असं या मंदिराचं नाव आहे. नेदरलँडमधील 1991 मध्ये श्रीलंकेतून काही तमिळ नागरीक आले होते. त्यावेळी त्यांनी हे मंदिर बांधलं आहे. प्रत्येक गणेशोत्सवात या मंदिरात भक्तांची मोठी गर्दी उफाळून येते.

श्री वरथराजा सेल्वविनायगर मंदिराचा पत्ता

एनी रोमेन-वर्स्चूरलान 32, 1784 एनझेड डेन हेल्डर, नेदरलँड असा या मंदिराचा पत्ता आहे. नेदरलँडला पोहचल्यावर मंदिरापर्यंत तुम्हाला पोहचण्यासाठी अनेक खासगी वाहने मिळतील.

भारतात गणपती बाप्पाची सर्वात जास्त मंदिरे आहेत. यामध्ये सिद्धिविनायक मंदिर, अष्टविनायक मंदिर, मधुर महागणपती मंदिर अशी अनेक प्रसिद्ध आणि नवसाला पावणाऱ्या गणरायाची मंदिरे आहेत.