आपल्याला कोणतीही समस्या असेल तर शरीर त्याचे संकेत तुम्हाला देत असतं. जर तुम्हाला सकाळी उठून थकल्यासारखं, सुस्त किंवा विचित्र वाटत असेल तर सावध व्हा. अनेक जणं या लक्षणांना कमी झोप किंवा ताण समजून पुढे चालतात. मात्र ही लक्षणं थायरॉईडच्या समस्येची असू शकतात.

आज या आर्टिकलमधून आम्ही तुम्हाला काही लक्षणं सांगणार आहोत ज्याकडे तुम्हाला लक्ष द्यावं लागणार आहे. शरीरात असणाऱ्या थायरॉईडच्या समस्येची काय लक्षणं दिसून येतात ते पाहूयात.

सकाळी थकवा जाणवणं

पुरेशी झोप घेतल्यानंतर देखील तुम्हाला सकाळी थकल्यासारखं किंवा सुस्त वाटत असेल तर याकडे दुर्लक्ष करू नका. याचा अर्थ थायरॉईड हार्मोनमध्ये काहीतरी गडबड असल्याचं लक्षण आहे.

चेहऱ्याला सूज येणं

सकाळी उठल्यावर जर तुमच्या डोळ्यांना सूज आली असेल किंवा चेहरा अचानक भारी जाणवत असेल तर ते थायरॉईडचं लक्षणं असू शकतं. हे लक्षण दिसल्यास वेळीच डॉक्टरांची मदत घ्यावी.

केस गळती

आजकाल लाईफस्टाईलमुळे केस गळतीची समस्या अनेकांमध्ये दिसून येतेय. मात्र जर वारंवार ही समस्या त्रास देत असेल तर सावध व्हा. कारण थायरॉईडच्या असंतुलनामुळे अधिक प्रमाणात केस गळतीची समस्या जाणते. याशिवाय केस रूक्षही होऊ लागतात.

सकाळी मूड स्विंग्स

जर सकाळी उठल्यानंतर फ्रेश होऊन देखील तुमचं काहीही करण्याचा मूड नसेल किंवा दररोज सकाळी हे मूड स्विंग्स जाणवत असतील तर ही चिंतेची बाब आहे. यावेळी थायरॉईडसोबत मानसिक आरोग्यही तुम्हाला तपासावं लागणार आहे.

वजनात बदल होणं

थायरॉईडमुळे अचानक मेटाबॉलिझ्म बिघडू शकतं. यावर परिणाम झाला की वजन वाढणं किंवा घटणं या तक्रारी उद्भवतात. जर सकाळच्या वेळी हे बदल दिसले तर वेळीच डॉक्टरांची मदत घ्यावी.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत