पपई गरम फळ असल्यामुळे अनेक लोक याचे सेवन करत नाहीत. पण पपईमुळे पावसाळ्यात शरीराला ऊब मिळते. रिकाम्या पोटी पपई खाल्ल्यानेव शरीराला असंख्य फायदे मिळतात. पावसाळ्यात होणाऱ्या संसर्गापासून आपले संरक्षण होते. पपईमध्ये फायबर, कॅल्शियम, पोटॅशियम, अँटीऑक्सिडेंट, व्हिटॅमिन्स भरपूर प्रमाणात असतात.

त्वचेचे आरोग्य

सकाळी रिकाम्या पोटी पपईचे सेवन केल्यास त्वचेचे आरोग्य सुधारते. तसेच पिंपल्सची संख्या कमी होते. पपईमधील अँटिऑक्सिडंट्स आणि व्हिटॅमिन सी त्वचेचा पोत सुधारण्यास मदत करते. त्वचेच्या पेशी दुरुस्त करून त्वचा हायड्रेट ठेवते.

हृदयाचे आरोग्य

अनेकांना हृदयविकाराचा त्रास असतो. अशा लोकांनी नियमित उपाशीपोटी पपईचे सेवन करावे. यामुळे शरीरातील कोलेस्ट्रॉलची पातळी नियंत्रणात राहते. पपईमधील पोटॅशियम उच्च रक्तदाब नियंत्रणात ठेवण्यास मदत करतो. यामुळे हृदयाचे आरोग्य चांगले राहते.

रोगप्रतिकारक शक्ती वाढते

सकाळी रिकाम्या पोटी पपई खाल्ल्यामुळे आपली रोगप्रतिकारक शक्ती वाढवण्यास मदत होते. तसेच शरीरातील विषारी पदार्थ बाहेर टाकले जातात. ज्यामुळे संसर्गाचा धोका टळतो. पपईमधील कॅल्शियम हाडे मजबूत करतात. तसेच सांधे दुखीवरही आराम मिळतो.

वजन कमी

पपईमध्ये कॅलरीजचे प्रमाण खूप कमी असते. ज्यामुळे वजन कमी होण्यास मदत मिळते. पोट दीर्घकाळ भरलेले राहते. यामुळे नियमित पपई सकाळी खावी.

पचनक्रिया सुरळीत

पपईमधील फायबर आणि अँटिऑक्सिडेंट गुणर्धम आपले पचन सुरळीत करते. तसेच आतड्यांचे आरोग्य सुधारते. ॲसिडीटीची समस्या उद्भवत नाही.

मधुमेह

रक्तातील साखरेचे प्रमाण कमी करण्यास पपई रामबाण उपाय आहे. मधुमेहाच्या लोकांनी रोज सकाळी रिकाम्या पोटी पपईचे सेवन करावे. पपईमुळे शरीरातील ग्लुकोज नियंत्रणात राहते.

शरीराला डिटॉक्स

सकाळी शरीराला डिटॉक्स केल्यास संपूर्ण दिवस चांगला जातो. त्यामुळे भरपूर पाणी प्यावे आणि फळांचे रस प्यावे. सकाळी रिकाम्या पोटी फळे खाल्ल्याने पावसाळ्यात शरीराच्या अनेक समस्यांपासून आपले संरक्षण होते. दिवसभर आपल्याला ऊर्जा मिळते.

डिस्क्लेमर : ही फक्त सामान्य माहिती आहे. अधिक तपशीलांसाठी डॉक्टरांशी संपर्क साधा.