आजकाल अयोग्य आहार, चुकीची जीवनशैली तसंच ताणतणाव यामुळे अनेक आजार आपल्या मागे लागतात. यापैकीच एक आजार म्हणजे कॅन्सर...पोटातील वेदना किंवा अस्वस्थता अनेकदा गॅस किंवा अपचनामुळे होणारा सामान्य त्रास म्हणून दुर्लक्षित केली जाते. मात्र पोटातील या वेदना कॅन्सरचं रूप घेऊ शकतो.

सतत असलेली किंवा सामान्यपेक्षा वेगळी पोटातील वेदना कधी कधी गंभीर आजाराचा संकेत देऊ शकते. जसं की, पोटाचा कॅन्सर (Stomach Cancer). अनेकदा पोटाचा कॅन्सर शरीरात होण्यापूर्वी काही लक्षणं दिसून येतात. ही लक्षणं नेमकी काय आहेत ते पाहूयात.

सतत पोटात वेदना किंवा जडपणा

जर तुम्हाला सातत्याने पोटात वेदना, जडपणा जाणवत असेल तर याकडे दुर्लक्ष करू नका. जर तुम्हाला हा त्रास काही आठवड्यांपासून होत असेल तर हे फक्त आम्ल किंवा गॅसचे लक्षण नाहीये. सततची पोटातील अस्वस्थता पोटाच्या कॅन्सरचं सुरुवातीचं लक्षणं असू शकतं.

वारंवार उलटी किंवा मळमळ

अनेकदा जास्त किंवा अरबट-चरबट खाल्लं की आपल्याला उल्टी-मळमळीचा त्रास जाणवतो. मात्र कारण नसतानाही वारंवार उलटी किंवा मळमळ जाणवली, तर याकडे दुर्लक्ष करू नये. यामुळे पोटाच्या आतल्या भागात कॅन्सरच्या पेशी असण्याची शक्यता असू शकते.

पोट भरल्यासारखं वाटणं

जर थोडेसं जेवल्यानंतरही तुम्हाला पोट भरल्यासारखं वाटत असेल किंवा अन्नाची इच्छा कमी झाली, तर याचा अर्थ पोटात ट्यूमर वाढतोय असा होऊ शकतो.

वजन कमी होणं

तुम्ही कोणतंही डाएट किंवा जीमला न जाताही वजन कमी होत असेल तर तो एक गंभीर इशारा आहे. हे पोटाचा कॅन्सर किंवा इतर मोठ्या आरोग्य समस्येशी संबंधित असण्याची शक्यता आहे.

रक्त दिसणं

उलटीत किंवा विष्ठेत रक्त दिसल्यास ते शरीराच्या आत असलेल्या रक्तस्त्रावाचे संकेत असतात. हे पोट किंवा आतड्यांमध्ये कॅन्सर असल्याचं लक्षण असू शकतं. त्यामुळे अशा वेळी तातडीने डॉक्टरांचा सल्ला घ्यावा.

सतत थकवा

कॅन्सरच्या पेशींना बरीच ऊर्जा लागते. अशावेळी रुग्णाला सतत थकल्यासारखं, अशक्त आणि सुस्त राहण्याची सवय लागते. यामध्ये रूग्णाने अगदी योग्य आहार आणि विश्रांती घेतल्यावरही त्याला हा त्रास जाणवू शकतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत