जेव्हा शरीरामध्ये संसर्ग होतो तेव्हा आतल्या आत एक शांत लढाई सुरु असते. यावर शरीर कधीकधी मात करतं पण याचा आपल्याला काहीच पत्ता लागत नाही. पण काही वेळा संसर्गाची सुरुवात खूप साध्या लक्षणांपासून होत असते. जसं की, आपण कमी काम करून खूप थकतो, आपल्याला ताण येतो किंवा हवामान बदल यामुळे झाल्याचं समजून दुर्लक्ष करतो. मात्र हीच लक्षणं शरीराकडून दिला जाणारा इशारा असू शकतात.

अचानक सतत थकवा जाणवणं, अंगात शक्ती नसल्यासारखं वाटणं किंवा सुस्ती येणं हे फक्त झोपेअभावी होतं असं नाही. शरीर जेव्हा संसर्गाशी लढत असतं, तेव्हा मोठ्या प्रमाणात ऊर्जा इम्युन सिस्टीममध्ये खर्च होते.

हलका ताप, अंगावर वारंवार शहारे येणं किंवा रात्री झोपेत घाम येणं ही लक्षणं बऱ्याचदा गंभीर वाटत नाहीत. मोठा ताप नसल्यामुळे लोक पेनकिलर घेऊन त्याकडे दुर्लक्ष करतात. पण कारण नसताना असे बदल अनेक दिवस टिकून राहिले, तर ते संसर्गाची सुरुवात असू शकते आणि डॉक्टरांचा सल्ला घेणं आवश्यक ठरू शकतं.

कधी कधी शरीरात कुठेही ठोस कारण नसताना दुखणं, स्नायूंमध्ये ताण जाणवणं किंवा सांध्यांमध्ये हलकी वेदना होणंही संसर्गाचं लक्षण असू शकतं. ही वेदना सूजेमुळे येते, मात्र ती अनेकदा कामाचा ताण किंवा थकवा म्हणून दुर्लक्षित केली जाते.

भूक न लागणं, पोटात मुरडा येणं, हलकी मळमळ किंवा जुलाब होणं हे फक्त अपचनाचं लक्षण असंच नाही. अनेक वेळा आतड्यांमधील संसर्ग किंवा शरीरात सुरू असलेल्या लढ्याचा परिणाम पचनसंस्थेवर दिसून येतो.

नाक बंद राहणं, हलकी खोकला, घशात खवखव किंवा श्वास घेण्यात थोडासा बदल जाणवणं सुरुवातीला साध्या सर्दीसारखं वाटतं. मान किंवा कंबरजवळील लिम्फ नोड्स सूजणं म्हणजे शरीर संरक्षणासाठी जास्त प्रमाणात इम्युन सेल्स तयार करत असल्याचं लक्षण असतं. त्याचप्रमाणे कुठेही दुखापत नसताना त्वचेवर लालसरपणा किंवा उष्णता जाणवणंही संसर्गाकडे इशारा करू शकतं. ही लक्षणं लहान वाटली तरी ती महत्त्वाची असतात.

याशिवाय मूड सतत बिघडणं, चिडचिड वाढणं, डोकं जड वाटणं किंवा लक्ष केंद्रित न होणं यालाही फक्त मानसिक ताण समजून चालणार नाही. शरीरात चालू असलेल्या संसर्गाचा परिणाम मेंदूच्या कार्यक्षमतेवरही होतो.