जर तुम्हाला सकाळी उठल्यावर तोंडात आंबट चव किंवा वारंवार आंबट ढेकर येत असतील तर तुम्ही याकडे सामान्य ॲसिडिटी म्हणून दुर्लक्ष करू नये. डॉक्टरांच्या मते, हे पचनसंस्थेतील समस्या, ॲसिड रिफ्लक्स, पोटाचा संसर्ग किंवा यकृताच्या समस्यांचं लक्षण असू शकतं. खाण्याच्या चुकीच्या सवयी, रात्री उशिरा जेवणं आणि तणाव यामुळे ही समस्या वाढू शकतात.

तज्ञांच्या मते, जेव्हा पोटात तयार होणारं हायड्रोक्लोरिक ऍसिड जास्त प्रमाणात तयार होतं किंवा अन्न योग्य पद्धतीने पचत नाही तेव्हा ते अन्ननलिकेतून वरच्या बाजूला येऊ लागतं. यामुळे आंबट ढेकर येणं, छातीत जळजळ, तोंडात कडू चव आणि गॅस यांसारख्या समस्या उद्भवतात.

जीवनशैली हा देखील एक महत्त्वाचा घटक मानला जातो. रात्री उशिरा तळलेलं आणि मसालेदार पदार्थ खाणं, कोल्ड ड्रिंक्स, मद्यपान, धूम्रपान, घाईघाईने जेवणं आणि जेवणानंतर लगेच झोपणं यामुळे पोटातील पीएच पातळी बिघडू शकते. यामुळे गॅस जमा होतो आणि ढेकर येण्याची समस्या अधिकच वाढते. तणाव आणि अपुरी झोप यामुळेही ही समस्या आणखी वाढू शकते.

काही प्रकरणांमध्ये, आंबट ढेकर येणं हे केवळ आम्लपित्ताचेच नव्हे तर पोटातील बॅक्टेरीयाचंही लक्षण असू शकतात. काही रिपोर्ट्सनुसार, एच. पायलोरी (H. pylori) बॅक्टेरिया किंवा पचनसंस्थेच्या समस्यांमुळे दुर्गंधीयुक्त ढेकर, पोट फुगणं आणि ॲसिड रिफ्लक्स होऊ शकतो.

ही 6 लक्षणं दिसली तर तपासणी करून घ्या

डॉक्टरांच्या मते, जर तुम्हाला आठवड्यातून अनेक वेळा सतत आंबर ढेकर येत असतील आणि त्यासोबत पोटदुखी, उलट्या, जुलाब, वजन कमी होणं किंवा गिळण्यास त्रास होत असेल, तर तुम्ही ताबडतोब तपासणी करून घेतली पाहिजे. दीर्घकाळच्या आम्लपित्तामुळे अन्ननलिकेच्या आणि लिव्हरच्या गंभीर आजारांचा धोकाही वाढू शकतो.

आयुर्वेदात सांगितले उपाय

या समस्येपासून आराम मिळवण्यासाठी आयुर्वेदात अनेक सोपे घरगुती उपाय सुचवले आहेत. जेवणानंतर बडीशेप आणि खडीसाखर खाल्ल्याने पचनक्रिया सुधारते आणि गॅस कमी होण्यास मदत होते. मध मिसळलेलं कोमट पाणी पिणं देखील फायदेशीर मानलं जातं. रिकाम्या पोटी नारळाचे पाणी प्यायल्याने पोटातील पित्त नियंत्रित राहण्यास आणि शरीरातील पाण्याची पातळी टिकवून ठेवण्यास मदत होते.