उद्यापासून नवीन वर्षाला सुरुवात होणार आहे. आज २०२४ या वर्षाचा शेवटचा दिवस आहे. हिंदू धर्मामध्ये नवीन वर्षाची सुरुवात विशेष मानण्यात येते. नवीन वर्ष नेहमीच नवीन आशा आणि भरपूर आनंद घेऊन येतं. 2025 हे वर्ष तुमच्यासाठी आनंदाचं आणि भरभराटीचं असावं असं तुम्हाला वाटत असेल तर त्याची सुरुवात योग्य पद्धतीने करणं फार गरजेचं आहे.

ज्योतिष शास्त्रानुसार, नवीन वर्षाची सुरुवात काही ज्योतिष्य उपायांनी केल्यास ते तुमच्या जीवनात सुख, समृद्धी घेऊन येईल. तुमच्यावर संपत्तीची देवी लक्ष्मीची कृपा वर्षभर राहू शकणार आहे. चला तर मग जाणून घेऊया 2025 च्या सुरुवातीला कोणते उपाय केले पाहिजेत.

ब्रह्म मुहूर्तावर उठा

सनातन धर्मात ब्रह्म मुहूर्ताचा काळ अत्यंत शुभ मानला जातो. धार्मिक मान्यतेनुसार, ब्रह्म मुहूर्तामध्ये केलेल्या कामाचं फळ अनेक पटीने मिळू शकतं. त्यामुळे ब्रह्म मुहूर्तावर जागरण करून नवीन वर्षाची सुरुवात केली पाहिजे. यावेळी ध्यान, योग किंवा प्रार्थना करा.

सकाळी उठून काय करावं?

ज्योतिषशास्त्रानुसार, सकाळी उठल्याबरोबर तळहातांकडे पाहणं शुभ मानण्यात येतं. असं म्हणतात की, लक्ष्मी, सरस्वती आणि भगवान विष्णू आपल्या तळ हातात वास करतात. नवीन वर्षाच्या पहिल्या दिवशी उठल्याबरोबर तुमच्या तळहातांकडे पाहा आणि या मंत्राचा जप करा.

“कराग्रे वसते लक्ष्मी, करमध्ये सरस्वती।

करमूले स्थितो ब्रह्मा, प्रभाते करदर्शनम्।।”

गरजूंना दान करा

एखाद्या गरजूला मदत करून नवीन वर्षाची सुरुवात करणं तुमच्यासाठी फायदेशीर ठरू शकतं. या दिवशी एखाद्या गरजू व्यक्तीला अन्न, कपडे किंवा इतर आवश्यक वस्तू दान करा. यामुळे तुम्हाला आध्यात्मिक शांती मिळू शकते. नव्या वर्षाची सुरुवात करण्याचा हा सर्वोत्तम मार्ग आहे.

देवाजी पुजा करा

नवीन वर्षाच्या पहिल्या दिवशी देवाची पूजा करा. घरातील देव्हाऱ्या दिवा लावा आणि संपूर्ण कुटुंबासह देवाकडे प्रार्थना करा. या दिवशी घर सजवा आणि कुटुंबासोबत वेळ घालवा. घरातील आनंदी वातावरण ठेवा. जेणेकरून वर्षाची सुरुवात आनंददायी होईल.

नवा संकल्प करा

नवीन वर्ष म्हणजे नवीन सुरुवातीचा काळ मानला जातो. या दिवशी तुमचं जीवन सुधारण्यासाठी एक चांगला संकल्प घ्या. यामध्ये तुम्ही दररोज व्यायाम करणं, वेळेवर काम करणं किंवा कोणतीही वाईट सवय सोडून देणं हे संकल्प करू शकता.

(Disclaimer - या ठिकाणी दिलेली माहिती ज्योतिष शास्त्रावर आधारित असून ती केवळ माहितीसाठी दिली जात आहे. आम्ही या गोष्टींना दुजोरा देत नाही. कोणताही उपाय करण्यापूर्वी संबंधित विषयातील तज्ज्ञांचा सल्ला अवश्य घ्या.)