ब्लड कॅन्सर ही एक गंभीर आणि जीवघेणी आजार आहे. मात्र यापेक्षाही अधिक चिंतेची बाब म्हणजे गेल्या काही वर्षांमध्ये या आजाराचे प्रमाण प्रचंड वाढलंय. त्यामुळे ब्लड कॅन्सर आता दुर्मिळ आजार राहिलेला नाही. संपूर्ण जगभरात या आजाराच्या वाढत्या प्रकरणांनी आरोग्य संस्थेवर ताण येतोय.

२०२२ मध्ये ग्लोबोकॅन या संस्थेने एक रिपोर्ट प्रकाशित केला होता. या रिपोर्टमध्ये भारतातील ब्लड कॅन्सरशी संबंधित धक्कादायक आकडेवारी समोर आली. या रिपोर्टनुसार, फक्त २०२२ मध्येच भारतात ब्लड कॅन्सरमुळे मृत्यू होणाऱ्यांची संख्या ७०,००० च्या पुढे गेली.

तज्ज्ञांच्या म्हणण्यानुसार, ब्लड कॅन्सरवर जर आपण वेळेच उपचार केले तर आणि तात्काळ उपचार सुरू झाले तर रुग्णाचा जीव वाचवण्याची शक्यता मोठ्या प्रमाणावर वाढते. त्यामुळे आपल्या शरीरात कोणतेही बदल जाणवत असतील तर वेळीच डॉक्टरांची मदत घेतली पाहिजे. विशेषतः जी काही गंभीर लक्षणं आहेत, त्याकडे दुर्लक्ष करू नये आणि लवकरात लवकर डॉक्टरांचा सल्ला घ्यावा.

ब्लड कॅन्सरची लक्षणं खासकरून रात्रीच्या वेळेस दिसून येतात. ही लक्षणं कोणती असतात ती जाणून घेऊया. जेणेकरून या गंभीर आजारावर उपचार करणं तुमच्या फायद्याचं ठरणार आहे.

सतत थकवा जाणवणं

ब्लड कॅन्सरचं एक प्राथमिक आणि सामान्य वाटणारं लक्षण म्हणजे सतत थकवा वाटणं. यामध्ये व्यक्तीला खूप आराम केल्यानंतरही झोप पूर्ण न झाल्यासारखं, ऊर्जा नसल्यासारखं वाटतं. हा थकवा काही वेळेस इतका असतो की अगदी दैनंदिन कामं करणंही कठीण होऊन जातं.

सतत इन्फेक्शन होणं

ब्लड कॅन्सरमुळे शरीराच्या इम्युनिटी सिस्टमवरही परिणाम होतो. यामध्ये शरीराची इम्युनिटी कमकुवत होते . त्यामुळे रुग्णाला वारंवार सर्दी, ताप, किंवा त्वचेचं इन्फेक्शनसारख्या समस्या होऊ लागतात.

सांधेदुखी आणि हाडांमध्ये वेदना

या आजारात काही रुग्णांना सांधेदुखीचा त्रास जाणवतो. पायांमध्ये विशेषतः रात्रीच्या वेळी तीव्र वेदना होणं हेही एक लक्षण आहे. काही वेळा या वेदना खूप दिवस टिकतात आणि औषधं घेतली तरी कमी होत नाहीत.

रात्री झोपताना घाम येणं

ब्लड कॅन्सरपैकी लिम्फोमा या प्रकारात, रात्री झोपताना अचानक किंवा खूप घाम येण्याची तक्रार रुग्णांना जाणवते. हा घाम इतका असतो की रुग्णाला झोपेतून जाग येते. हे एक महत्त्वाचं आणि गंभीर लक्षण आहे. ज्याकडे दुर्लक्ष करणं कठीण होऊ शकतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत