मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून इंडिया आघाडीचे खासदार आज पुन्हा आक्रमक झाले आहेत. काँग्रेस नेते राहुल गांधी यांच्या नेतृत्वाखाली खासदार जंतर-मंतरच्या दिशेने निघाले.
राहुल गांधी यांच्यासह इंडिया आघाडीचे शेकडो खासदार तीन बसमधून जंतर-मंतरच्या दिशेने रवाना झाले होते. यावेळी भाजप आणि निवडणूक आयोगाच्या विरोधात कार्यकर्त्यांनी जोरदार घोषणाबाजी केली.
खासदारांना रोखण्यासाठी पोलिसांचा मोठा फौजफाटा तैनात करण्यात आला होता. पोलिसांनी बसेस अडवल्यानंतर राहुल गांधी आणि प्रियंका गांधी यांनी कार्यकर्त्यांसह पायी जंतर-मंतरकडे जाण्याचा निर्णय घेतला.
पोलिसांनी राहुल गांधी आणि काँग्रेस कार्यकर्त्यांना पुढे जाण्यापासून रोखल्यानंतर प्रियंका गांधी यांनी रस्त्यावरच ठिय्या आंदोलन सुरू केलं. त्या रस्त्यावर झोपल्याचंही पाहायला मिळालं. यावेळी प्रियंका गांधी यांनी पोलिसांच्या कारवाईवर प्रश्न उपस्थित केला.
दरम्यान, जंतर-मंतरकडे जाण्याचा प्रयत्न करणाऱ्या राहुल गांधी यांना अखेर पोलिसांनी ताब्यात घेतलं. त्यामुळे इंडिया आघाडीच्या आंदोलनाला आता आणखी आक्रमक वळण मिळालं आहे.