Famous Actor Death: हिंदी चित्रपटसृष्टीतील दिग्गज अभिनेते देव आनंद यांचे सुपुत्र आणि अभिनेता सुनील आनंद यांचे वयाच्या ७०व्या वर्षी निधन झाले आहे. लंडनमध्ये त्यांना हृदयविकाराचा तीव्र झटका आला आणि उपचारादरम्यान त्यांची प्राणज्योत मालवली. त्यांच्या निधनाच्या वृत्ताने बॉलिवूडसह चाहत्यांमध्ये शोककळा पसरली आहे.

सुनील आनंद हे अभिनेते, निर्माते आणि दिग्गज अभिनेते देव आनंद यांचे एकुलते एक चिरंजीव होते. वडिलांच्या पावलावर पाऊल ठेवत त्यांनी चित्रपटसृष्टीत प्रवेश केला होता. १९८४ मध्ये प्रदर्शित झालेल्या आनंद और आनंद या चित्रपटातून त्यांनी अभिनय क्षेत्रात पदार्पण केले. या चित्रपटाचे दिग्दर्शन स्वतः देव आनंद यांनी केले होते. मात्र, वडिलांप्रमाणे मोठे स्टारडम त्यांना मिळू शकले नाही.

अभिनयासोबतच सुनील आनंद यांनी नवकेतन फिल्म्सच्या कामकाजातही महत्त्वाची भूमिका बजावली. चित्रपट निर्मिती, वितरण आणि वडिलांचा वारसा जपण्यासाठी त्यांनी अनेक वर्षे काम केले. त्यांनी ‘कार थीफ’, ‘मैं तेरे लिए’ आणि ‘मास्टर’ यांसारख्या चित्रपटांत काम केले. 

मिळालेल्या माहितीनुसार, काही दिवसांपासून ते लंडनमध्ये वास्तव्यास होते. तेथेच त्यांना अचानक हृदयविकाराचा झटका आला. डॉक्टरांनी त्यांना वाचवण्यासाठी प्रयत्न केले, मात्र उपचारादरम्यान त्यांचे निधन झाले. त्यांच्या निधनाबाबतची माहिती समोर आल्यानंतर अनेक कलाकार, चाहते आणि चित्रपटसृष्टीतील मान्यवरांनी सोशल मीडियाच्या माध्यमातून श्रद्धांजली वाहिली.