Varun Dhawan Daughter: अभिनेता वरुण धवन आणि नताशा दलाल यांनी २०२४ साली त्यांच्या मुलीचे स्वागत केले. त्यांनी तिचे नाव 'लारा' असे ठेवले. पण आता वरुनने लाराबद्दल धक्कादायक खुलासा केला आहे. मुलगी ‘लारा’ हिला ‘डेव्हलपमेंटल डिस्प्लेजिया ऑफ द हिप’ (DDH) या विकाराचे निदान झाल्याची माहिती नुकतीच समोर आली आहे. आता वरुण धवनने स्वतः तिची प्रकृती कशी आहे ते सांगितले.

एका पॉडकास्टमध्ये बोलताना वरुणने सांगितले की, या आजारामुळे लाराला चालायला त्रास होत आहे. तिच्या पायांमध्ये असंतुलन निर्माण झाल्याने तिला चालणे आणि धावणे कठीण जाते. या पार्श्वभूमीवर तिला विशेष वैद्यकीय उपचार देण्यात आले.

वरुणने सांगितले की, उपचार प्रक्रियेचा एक भाग म्हणून लाराला सुमारे अडीच महिने ‘स्पायका कास्ट’मध्ये ठेवावे लागले. हे एक विशेष प्रकारचे प्लास्टर असून, लहान मुलांमध्ये खुब्याच्या (hip) समस्यांवर उपचारासाठी वापरले जाते. कास्ट लावण्यापूर्वी तिला भूल देण्यात आली होती. मात्र, आता कास्ट काढण्यात आला असून, लाराची प्रकृती हळूहळू सुधारत असल्याची माहिती त्याने दिली.

DDHमध्ये मुलाचा खुब्याचा सांधा योग्य प्रकारे विकसित होत नाही. यामुळे पुढे चालताना अडचणी निर्माण होऊ शकतात. मात्र, लवकर निदान झाल्यास या आजारावर उपचार करता येतात, असे वरुणने स्पष्ट केले. विशेष म्हणजे, लाराच्या बाबतीत शस्त्रक्रियेची गरज लागली नाही.