Delhi Crime Season 2 Trailer | मुंबई : गेल्या वर्षी आंतरराष्ट्रीय एमी पुरस्कार जिंकणारा पहिला भारतीय शो बनून इतिहास रचणाऱ्या 'दिल्ली क्राइम'(Delhi Crime)च्या दुसऱ्या सीझनचा ट्रेलर रिलीज झाला आहे. या सीरीजने सर्वोत्कृष्ट ड्रामा सीरीज हा किताब पटकावला होतं. आता त्याच्या दुसऱ्या सीझनचा दमदार ट्रेलरही नेटफ्लिक्सने प्रदर्शित केला आहे. या ट्रेलरमध्ये अभिनेत्री शेफाली शाह(Shefali Shah) पुन्हा एकदा डीसीपी वर्तिका सिंगच्या भूमिकेत दिसणार आहे.

शेफाली शाहच्या टीममध्ये नीती सिंगची भूमिका रसिका दुग्गल आणि भूपेंद्र सिंगची भूमिका राजेश तैलंगने केली असून या सीरीजमधील अन्य काही कलाकार मागील सीझनप्रमाणेच राहतील. आदिल हुसैन, अनुराग अरोरा, सिद्धार्थ भारद्वाज आणि गोपाल दत्त सारखे कलाकार 'दिल्ली क्राइम २'मध्येही दिसणार आहेत.

या दुसऱ्या सीझनच्या ट्रेलरमध्ये एकामागून एक मृत्यू कसे घडत आहेत हे दाखवण्यात आले आहे आणि यावेळी दिल्ली पोलीस सीरियल किलरच्या शोधात आहेत. ट्रेलरमध्ये, शहरातील अशी परिस्थिती हाताळतान्यासाठीचा डीसीपी वर्तिका सिंगचा संघर्ष या ट्रेलरमध्ये दिसत आहे.

'दिल्ली क्राइम'चा पहिला सीझन सनडान्स फिल्म फेस्टिव्हलमध्ये २०१९ मध्ये इंडी एपिसोड कॅटेगरीमध्ये प्रदर्शित झाला होता, त्या वेळी या वेब सीरीजचे पहिले दोन भाग प्रदर्शित करण्यात आले होते. या फिल्म फेस्टिव्हलच्या वेळी नेटफ्लिक्सने ही वेब सीरीज विकत घेतली होती. रिची मेहता यांनी 'दिल्ली क्राइम'च्या पहिल्या सीझनचे लेखन, दिग्दर्शन आणि निर्मिती केली होती. 'दिल्ली क्राइम'च्या पहिला सीझन दिल्लीतील सामूहिक बलात्कार घटना आणि पोलिस तपासावर आधारित होता.

बॉलिवूड अभिनेत्री शेफाली शाहने तिच्या इन्स्टाग्राम हँडलवर 'दिल्ली क्राइम सीझन २' चा ट्रेलर शेअर केला आहे. हे शेअर करत शेफालीने लिहिले की, 'गुन्हेगारांची टोळी, दहशतीत शहर. डीसीपी वर्तिका आणि तिची टीम आगामी गुन्ह्यासाठी सज्ज आहेत का? दिल्ली क्राइम सीझन 2 चा ट्रेलर पाहा.