Muramba Serial: स्टार प्रवाहवरील लोकप्रिय मालिका 'मुरांबा'ने प्रेक्षकांच्या मनात विशेष स्थान मिळवले आहे. या मालिकेत दररोज येणारे नवे वळण, नवे ट्विस्ट आणि पात्रांमधील नात्यांची गुंतागुंत यामुळे प्रेक्षक कायम उत्सुक असतात. सध्या गणेशोत्सवाचे औचित्य साधत मालिकेत एक नवे भावनिक वळण दाखवले जात आहे.

नुकत्याच प्रदर्शित झालेल्या प्रोमोमध्ये दाखवले आहे की, आरोहीला आपल्या घरात बाप्पाची स्थापना व्हावी असे मनापासून वाटते. ती अक्षयला विचारते की आपण गणपती आणणार का? मात्र अक्षय तिच्या अपेक्षेप्रमाणे उत्तर न देता स्पष्ट नकार देतो. यामुळे आरोही हताश होते. तिच्या डोळ्यात अश्रू येतात आणि ती गणपतीसमोर प्रार्थना करते, “बाप्पा, माझ्या आईला घेऊन ये.” हा क्षण अत्यंत भावनिक असून प्रेक्षकांची मने पिळवटून टाकतो.

आरोहीच्या या शब्दांनी रमा मनोमन हेलावून जाते. आरोहीचे दुःख आणि तिची अपूर्ण इच्छा पाहून रमा ठरवते की, काहीही झाले तरी आरोहीला गणपतीच्या आगमनाचा आनंद मिळायला हवा. आणि मग ढोल-ताशांच्या गजरात, पारंपरिक वेशभूषेत रमा गणपतीची मूर्ती घेऊन घरात प्रवेश करते. तिच्या या आगमनाने आरोहीच्या चेहऱ्यावर आनंद ओसंडून वाहतो. ती धावत रमाकडे जाते आणि बाप्पाचे स्वागत करते.

परंतु या आनंदी प्रसंगामध्ये एक वेगळीच तणावाची छटा दिसते. आरोही आनंदाने न्हाऊन निघाली असताना अक्षय आणि इतर घरच्यांच्या चेहऱ्यावर मात्र चिंता स्पष्ट दिसते. बाप्पाचे आगमन आनंद देऊन जाते, परंतु त्याचबरोबर घरात नवे वादळ उभे राहण्याची शक्यता निर्माण होते.