बॉलिवूड अभिनेता अजय देवगनचा अॅक्शन चित्रपट सिंघम अगेनने बॉक्स ऑफिसवर धुराळा उडवून दिलाय. प्रदर्शित होताच चित्रपटाने बॉक्स ऑफिसमधील कमाईत भूकंप घडवून आणला. देशासह परदेशातही या चित्रपटाने डंका वाजवलाय. अवघ्या दोन दिवसात या चित्रपटाने १०० कोटींचा टप्पा गाठलाय.

'सिंघम अगेन' या ॲक्शन-थ्रिलर चित्रपटात 'बाजीराव सिंघम'ची भूमिका प्रेक्षकांच्या मनात बसलीय. चित्रपटाला समीक्षकांकडून चांगला प्रतिसाद मिळालाय आणि प्रेक्षकही चित्रपटगृहांमध्ये चित्रपटाचा आनंद घेताहेत. 'सिंघम अगेन'च्या कमाईने बॉक्स ऑफिसवर धुमाकूळ घातलाय. सॅकनिल्कच्या रिपोर्टनुसार, अजय देवगणच्या 'सिंघम अगेन' चित्रपटाने दोन दिवसांत १२५.२० कोटींचा धमाकेदार बिझनेस केलाय.

'सिंघम अगेन' चित्रपटाने भारतात शुक्रवारी ४३.५ कोटींचा व्यवसाय केला. शनिवारी देशभरात ४२.५ कोटी रुपयांची कमाई झाली. अशाप्रकारे 'सिंघम अगेन'ने दोन दिवसांत भारतात ८६ कोटी रुपयांचा गल्ला जमवला होता.

'सिंघम अगेन'मध्ये अजय देवगणने 'बाजीराव सिंघम'ची भूमिका साकारली आहे. रणवीर सिंगने सिम्बाची भूमिका साकारलीय. अक्षय कुमारने डीसीपी वीर सूर्यवंशीची भूमिका साकारलीय. करीना कपूरने अवनी आणि दीपिकाने शक्ती शेट्टीची भूमिका साकारलीय. या व्यतिरिक्त अर्जुन कपूर, टायगर श्रॉफ, जॅकी श्रॉफ, रवी किशन आणि श्वेता तिवारीने या चित्रपटात भूमिका साकारलीय. 'सिंघम अगेन' हा कॉप युनिव्हर्सचा पाचवा चित्रपट आहे.

याआधी ‘सिंघम’, ‘सिंघम रिटर्न्स’, ‘सिम्बा’ आणि ‘सूर्यवंशी’ हे चित्रपट सुपरहिट ठरलेत. दरम्यान 'सिंघम अगेन' हा चित्रपट २०११ मध्ये रिलीज झालेल्या 'सिंघम', चित्रपटाचा पाचवा भाग आहे. या सिनेमामध्ये अभिनेत्री काजल अग्रवाल आणि प्रकाश राज यांच्या प्रमुख भूमिका होत्या.

'सिंघम अगेन' चित्रपटाची भुल भुलैया या चित्रपटासोबत स्पर्धा सुरूय. हे दोन्ही चित्रपट दिवाळीच्या दिवशी चित्रपटगृहात प्रदर्शित झालेत. प्रेक्षकांनी दोन्ही चित्रपटांना पसंत केलंय. कार्तिक आर्यनच्या हॉरर कॉमेडी चित्रपटाने शुक्रवारी पहिल्या दिवशी ३५.५ कोटींची कमाई केली. दिवाळीच्या सण संपल्यानंतर हा चित्रपट प्रेक्षकांना आपल्याकडे किती प्रमाणात आकर्षित करतो ते पाहणं महत्त्वाचं ठरणार आहे.